Shillong, Nailur 27
Ka Langsning FC ka la lah ban jam biang sha ka kyrdan ba hakhlieh ha ka lympung ïalehkai Shillong Premier League 2026, hadien ba ka la lah ban pynliem ïa ka Laitkor SC da 2-0 kol ha ka sngi Saitjaiñ ha SSA Stadium, Polo.
Kane ka la wan urlong lyngba u Wallambok Dkhar (77′) bad u Samuel James L Kynshi (90’+2) na ka bynta ban pynlong ïa ka Langsning ban tam da 2 poiñ ïa ka Shillong Lajong (14 poiñ), kaba la hiar mynta sha ka kyrdan ba-ar. Baroh artylli kine ki klob ki la lah ban ïakhun mar 7 tylli ki jingïalehkai.
Katba ka Mylliem kaba la mat ïa ka jingshah rem kaba hynriew ha kane ka lympung bad ka la thikna ban shah pynhiar kyrdan namar ka la don ha ka kyrdan ba shatrai bad kamai tang 1 poiñ ha ki hynñiew sien ïakhun.
Ïa ka kol ba nyngkong, ka Langsning FC ka la ïoh ban thep lyngba ka corner ha kaba u Wallambok u la ïoh ban pyndei da ka khlieh bad ka la rung sha kol.
Katba ka kol kaba ar u Samuel u la khyrwit jam bha na bar ka ‘box’ kaba la suh beit na ki ksangti u Rihoklang Khongjoh u rangapkol ka Laitkor uba khlem lah ban bat skhem ïa ka.
Hadien kane mih paw pat ki kabu ksiar sha ka kynhun ïalehkai jong ka Mylliem, ha kaba u Remark Kharmalki u la shut jam bha ïa kawei ka free-kick, hynrei ka bol ka la her kham shalor. Kumjuh u Caldolan Kharmawphlang bad Istarbor Marngar ki la ïalehkai lang ha ka ban rah bol, hyneri u Caldolan um shym la lah ban pynurlong.
Sha shilliang pat u Kyrmens -khem Mukhim, Syed Ahmed, ki long ki rangïalehkai kiba pynkhihwin bha ïa ka kut ïalehkai ka Laitkor ïa kaba la bynrap lang na u Mebanshngaiñ Kurkalang, ha kaba kine lai ngut ki la ïoh ïa ki bol ba biang bha, hynrei kaba kut ka long ba kim shim la lah ban pynurlong.
Lyngba kane ka jingjop, ka la long ka jingai mynsiem ïa ka Langsning ba kan dangpynkhreh ban ïalehkai bha ha ki jingïakhun ban wan pyrshah pyrshah ïa ka Shillong Lajong FC ha ka 1 tarik u Risaw bad ïa ka Nongkseh ha ka 10 tarik. Kine ki ar tylli ki long kum ki jingïakhun final na ka bynta ban rah biang ïa ka nam ladduh ha kane ka aïom kaba mynta.
Ka jingïakhun ha ka lah sngi U Blei kan long hapdeng ka Nongkseh SSCC pyrshah ïa ka Sawmer SC ha ka por 3 baje nohphai sngi.
