Shillong, Nailur 28
Ka India ka la lah ban bteng ïa ka jingkhlaiñ bor jong ka ha ka Asian Games 2026 ha ka lah sngi U Blei, ha kaba ka la khur phra tylli ki takma na ka athletics, shooting bad kurash.
Pynban kane ka kynhun ka dangdon shabar na ka thup kaba shiphew ne Top 10, ha kaba ka ri India ka dangïai sah ha ka kyrdan ba khadar bad ka dangïai khmih lynti ban khur sa kawei ka takma ksiar.
Ha kane ka sngi ka India ka la khur sa saw tylli ki takma rupa bad saw tylli ki takma rnong, hynrei kam shym la lah ban khur ïa ka takma ksiar. Haduh ka sngi kaba khyndai, ka India ka la khur 45 tylli ki takma- 4 ki takma ksiar, 20 ki rupa lem bad 21 tylli ki tama rnong.
Ïa kitei ki takma rupa la khur da u Yashvir Singh, Murali Sreesha-nkar, Gulveer Singh bad ka Esha Singh, katba u Rohit Yadav, Parul Chaudhary, Vithya Ramraj bad ka Pincky Balhara ki la khur ïa ka takma rnong. Ka jingkhlaiñ jong ka India ka la long lyngba ka jingkawang sum ne javelin jong ki shynrang, ha kaba u Yashvir bad u Rohit ki la lah ban khur takma watla ym shym la ïadon lang u Neeraj Chopra, uba la bat ïa ka nam lahduh.
U Yashvir u la khur ïa ka rekod da kaba u la lah ban kynthih 85.72m na ka bynta ban khur ïa ka takma rupa, katba u Rohit u la khur ïa ka takma rnong da kaba kynthih ha ki 84.35m. Katba u rangïalehkai ka Sri Lanka u Rumesh Pathirage u la khur ïa ka takma ksiar da kaba kynthih ha ki 88.55m.
Kumjuh u Sreeshankar u la khur ïa ka takma rupa ha ka long jump ki shynrang da kaba kynthih ha ki 8.07m wat hapdeng ka jingmynsaw kaba u la pynkut noh ïa ka jingpyrshang kaba khatduh. Ïa ka takma ksiar la khur da u Yuhao Shi na China (8.17m).
U Gulveer u la bynrap ïa kawei pat ka takma rupa na ka bynta ka India ha kaba u la lah ban pyndep ha ki 3:36.72 ha ka jingïakop mareh 1500m jong ki shynrang, ha kaba kham hashwa u la wan ha ka kyrdan ba-ar ha ka 10,000m.
Haba phai sha ki kynthei, ka Parul Chaudhary ka la khur ïa ka takma rnong ha ka 5000m da kaba pyndep ha ki 15:14.61. Kane ka ‘thei ïalehkai ka la khur ruh sa kawei ka takma rnong ha ka 3000m steeplechase. Ka Vithya Ramraj ka la khur ïa ka takma rnong ha ka 400m hurdles jong ki kynthei da kaba pyndep ha ki 54.75 sekhon.
Ka India ka la khur takma rnong sa na ka Esha Singh ha ka 25m pistol jong ki kynthei hadien ba ka la lah ban siat 38, kaba long kajuh ka jingkamai da ka Xiao Jiaruixuan na China, kaba la khur ïa ka takma ksiar.
Kumjuh ka India ka la khur ïa ka takma rnong lyngba ka Pincky Balhara ha ka jingïalehkai Kurash (78kg), hadien ba ka la shah rem noh da 0-5 ha ka nongïalehkai na South Korea ka Sumin Mo ha ka semi final.
Kumba ka paw ka China ka danglong ka kynhun kaba danglamkhmat ha kane ka lympung ha kaba ka la khur 132 tylli ki takma ksiar, ha kaba la bud sa ka Japan da kaba khur 41 tylli ki takma ksiar, balai ka South Korea (21 tylli ki takma ksiar) bad ka Uzbekistan (12 tylli ki takma ksiar).
