Shillong, Nailur 28
Sa tang hynriew bnai ban sdang ïa ka 39th National Games, ka jylla Meghalaya ka ïai bteng ban pyndep ïa ki jingtei bad baroh ki jingdonkam na ka bynta kane ka lympung ïalehkai kaba heh hapoh ka ri ka ban long ha u snem ban wan.
U Chairman ka Assembly’s Estimates Committee u Bah Mayralborn Syiem ha ka lah sngi U Blei u la bishar bniah ïa kane ka jingpynkhreh bad ka tnad ïalehkai ka Sorkar Jylla.
“Ngi la bishar bniah ïa ka jingpynkhreh ban pynlong ïa ka 39th National Games ha Meghalaya ha u snem 2027. Ka tnad ka la pynshai hakhmat ka komiti halor kane ka jingpynkhreh,” la ong u Bah Syiem, uba long u MLA ka BJP na Nongpoh.
U la ong ba ki jingtei ki dangïaid mynta ym tang ha nongbah Shillong hynrei ha kylleng ka Jylla.
“La pynkhreh ïa ki jingtei ha ki jaka bapher bapher jong ka nongbah Shillong, Tura, Jowai bad ha ki khyndiat tylli ki jaka jong ka East Khasi Hills bad Ri-Bhoi. La pynkhreh ruh ïa ki nongïalehkai ha ki jingïalehkai bapher bapher,” u la bynrap.
U Bah Syiem u la kam ba ki jaka sah, ka leit ka wan bad ka jingpynpoi marbam ki dang long ka jingeh, hynrei u la ong ba ka komiti ka don ka jingkyrmen hadien ba la ïoh ka jingpynshai.
“Ka dei ka jingeh ïa ka Jylla, hynrei ngi don ka jingkyrmen ba baroh ki jingtei yn sa lah ban pyndep ha ka por kaba biang. Ngi dangsah sa hynriew bnai ban pyndep,” la ong u Bah Mayralborn.
Ha kane ka lympung kin don 39 tylli ki jingïalehkai, ha kaba ka Meghalaya ka long ka nongpynlong ïa kane ka lympung, katba kiwei pat ki jylla ka thaiñ shatei lammihngi kin ïoh ban pynlong mar kawei ka jingïalehkai.
“Ngi don ka jingkyrmen ba ki nongïalehkai jong ngi shynrang bad kynthei kin long kiba la pynkhreh bha namar ka Sorkar Jylla ka la dep ban pynbiang ha ka liang ka pisa tyngka. Na ka liang u Myntri Rangbah bad u Myntri ka tnat ïalehkai ki thrang ban pynthikna ïa ka jingbam kaba biang, ka jinghikai bad ki coach kiba na ka Jylla bad kiba nabar khnang ba kin lah ban wanrah ïa ka Jylla da kaba khur ïa ki takma ksiar, rupa bad rnong,” la bynrap biang u Bah Syiem.
