Shillong, Nailur 28
Ka Nongkseh SSCC ka la pynliem noh ïa ka Sawmer SC da 3-0 kol na ka bynta ban jam sha ka kyrdan balai ha ka Shillong Premier League 2026, ha ka lah sngi U Blei ha SSA Stadium, Polo.
Kane ka la wan lyngba ki lai tylli ki kol ba la thep da u Kitboklang Pale (30′), Mebankhraw Wahlang (37′) bad u Hardy Cliff Nongbri (88′) ha kaba ka pynlong ïa kane ka kynhun ban kamai 13 poiñ bad tam ta shi poiñ ïa ka Mawlai SC, kaba la hiar sha ka kyrdan basaw.
Ha kaba sdang ka jingïakhun, ka Sawmer SC ka la i kumba ka la ïalehkai bha, ha kaba kam shym la kheiñ sting ïa ka liang pyrshah kaba dei na kajuh ka thaiñ Upper Shillong. Pynban da ka jingdon ïa ki rangïalehkai kiba la san la rangbah bad kiba la kham tbit, ka pynlong ïa kane ka kynhun ka ba kan ym lah ban shan slem, hadien ba u Kitboklang u la lah ban tehlakam ïa ka bol kaba la pynbuh sha u bad ha ka por ba biang bha u la lah ban pynkhih jar.
Hadien khyndiat minit na kane ka kol u Kitboklang, ka Nongkseh ka la ïoh ban thep biang ïa ka kol kaba ar, kaba ha kane ka kynti ka wan lyngba ka corner ba la shut da u Hardy bad u Mebankhraw u la lah ban ïoh kynthih kham halor bad ban pyndei da ka khlieh na ka bynta ban thep kol.
U rangapkol ka Sawmer u Pyrshangbanbha Dkhar, uba bunsien u kham thurmur bha ha ka rukom ïalehkai, hynrei ha ka jingïakhun ba hynne ka sngi, u la pynpaw biang ïa ka jingtbit bad ka sap ïalehkai jong u, ha kaba u la lah ban kyrda ïa ki ar tylli ki jingpyrshang jong ka Nongkseh, ha ki minit shwa ban kut ka kylla step.
Haba wan ban bteng ïa ka kylla miet, ka Nongkseh ka ïai pynpaw ïa ka jingkhlaiñ bor jong ka. Hynrei ka kol kaba lai ka mih paw hadien ba u Hardy u la ïoh ban thep, lyngba ka ka jingpyrshang u Kitboklang uba la ïoh ban rah ïa ka bol haduh jan ka kol ka Sawmer, bad ha ka por ba biang u la pyllait sha u Hardy, uba la thep da kaba suk ïa ka.
Ka jingïalehkai mynta ka sngi Ba-ar kan long hapdeng ka Mawlai SC pyrshah ïa ka Meghalaya Police F.T ha ka por 3 baje nohphai sngi.
