Aizawl, Nailur:
Ka Chakma Autonomous District Council (CADC) ha Mizoram’s Lawngtlai distrik ka la rai ban wanrah ïa ka National Education Policy (NEP) naduh ka por pule jong u snem 2027-28 bad kan wanrah ïa ka ‘Mizo Speaking Day’ man ka taïew ha baroh ki skul rit bad ki skul heh kiba hap hapoh ka jingpeit jong ka, la ong uwei u heh sorkar ha ka lah sngi u Blei.
Ïa kine ki rai la shim ha ka jingïalang halor ka jingpynïaid ïa ka pule puthi kaba la long ha ophis treikam jong ka council ha Kamalanagar ha ka Sngi U Blei. Ïa kane ka jingïalang la pynïaid da u Executive Member in-charge ka tnad pule puthi u Doymoy Daveng Chakma.
Hapoh kane ka jingthmu kaba thymmai, man la ka sngi Balang yn rakhe kum ka ‘Mizo Speaking Day’ ha baroh ki skul rit bad ki skul heh kiba don hapoh ka thaiñ jong ka CADC. Kane ka jingthmu ka long ban ailad ïa ki khynnah pule man ka por ban nang bad pyndonkam ïa ka ktien Mizo.
La thaw ïa ka komiti ba la khlieh da u Primary Education Department Office Superintendent u Satish Chakma ban pynkhreh ïa ki kyndon bad ki rukom treikam ban pyntreikam ia kane ka prokram, la ong u heh sorkar. Ka jingïalang ka la shim ruh ïa ka rai ban shim bad pyntreikam ïa ka NEP naduh ka Academic Session 2027-28 katkum ka Policy Framework bad ki jingbthah jong ka sorkar Mizoram.
Ka District School Education Board (DSEB) bad ki tnad pule ba dei peit kin shim ïa ki lad pynkhreh bad pynmih ïa ki jingbthah ba bniah ban pyntreikam.Ka jingïalang ka la mynjur ruh ha ka nongrim ïa ka Draft jong ka kyndon jong ka Chakma Autonomous District Council (Ka jingpynkynriah bad ka jingbuh kam ïa ki nonghikai skul rit), 2026.
Ka komiti bishar bniah kaba la khlieh da u Punya Jagat Talukdar u ophisar jong ka pule puthi la bthah ban bishar bniah ïa ki kyndon ba la shna bad ban pyndep ïa ki ha ka 10 tarik u Risaw bad hadien kata yn sa buh ha khmat ka Executive Committee ban bishar bniah. Ka jingïalang ka la rai shuh shuh ban sdang ïa ka prokram pule kot kaba ryntih ha ka thaiñ jong ka CADC, katkum ka jingmynjur jong ka komiti treikam bad ka jingdon pisa.
Ka la rai ruh ban pyntreikam ïa ka jingpyrkhat ‘Anapana’ kaba 10 minit man la ka sngi Thohdieng ha baroh ki skul rit bad skul heh kiba don hapoh ka konsil, la ong u heh sorkar.
