Nongstoiñ, Nailur 29
Ka 4th MLP Battalion Sohpian ka la khur ïa ka jingjop ha ka lympung ïalehkai 1st Veteran Knockout Football Tournament 2026, hadien ba ka la pynliem noh ïa ka Lai Lyngdoh FC da 5-0 kol ha ka sngi Ba-ar ha madan Mawkaton, West Khasi Hills.
Kane ka nam jop ka la wan lyngba u Stanly War, Kyrsoi Mawphniang, George Mawsor, Kaibir Marsharing bad u Larbha Parïong na ka bynta ban khur ïa ki lai poiñ.
Ha kane ka jingïakhun ka MLP ka la lah ban pynpaw ïa ka jingtbit ha ka rukom ïalehkai ha kaba ka la ïoh ban thep lai kol ha ka kylla step lyngba u Stanly War ha ka minit kaba 10, kumjuh u Kaibir Marsharing (32) bad u Kyrsoi Mawphniang (45).
Kane ka kynhun ka la thep biang sa ar kol ha ka kylla miet lyngba u Larbha Pariong (46) bad u George Mawsor (47) na ka bynta ban khur syndon ïa ka jingjop.
Haba phai pat sha kawei ka lympung ïalehkai Mawkaton Invitation Football Tournament 2026 ba la pynlong da ka Mawkaton Sports and Cultural Youth Club ha kajuh ka madan ïalehkai, ka Golden Touch Academy ka la jop da 6-2 kol ïa ka Mawlieh Area.
