Shillong, Nailur 29
Ka nongbah Shillong ka la shah jied kum ka jaka na ka bynta ka wat kaba nyngkong jong ka Second Division ha ka Indian Women’s League 2026-27 (IWL 2), la pynbna ka Meghalaya Football Association (MFA) ha ka sngi Ba-ar.
Ïa ki jingïalehkai jong ka Group-C yn pynlong ha SSA Stadium kaba ha Polo ha u bnai ban wan, ha kaba ka Jakrem FC, kaba long ka lahduh ha ka Meghalaya Women’s State League 2025, kan shim bynta ha ka sien kaba nyngkong ha kane ka lympung.
Kumba ka paw ym pat shym la don napdeng ki kynhun kiba na kane ka Jylla ki ban ïoh ka lad ban shim bynta ha ka IWL lane ka IWL 2, watla ka Royal Wahingdoh ka la shah khot sngewbha ban shim bynta ha ka lympung ïaknieh (qualifiers) jong ka IWL ha ka aïom ïalehkai 2026-17. Hynrei kam shym la lah ban jam sha ka wat jingïakhun kaba kongsan hadien ba ka la shah rem baroh saw tylli ki jingïalehkai.
Hynrei lyngba ka jingshim khia ka MFA ban pynlong ïa ka Meghalaya Women’s State League ha u snem ba la lah, ka Jakrem ka la ïoh ka lad ban shim bynta ha ka IWL 2 mynta ka aïom.
Te kumta ka Jakrem kan ïasoh lang bad ki kynhun kiba kynthup ïa ka TDS Academy jong ka AIFF, Kemp FC bad ka Mumbai Knights FC kiba don ha ka Group-C.
Katkum ka prokram ïalehkai, la ong ba ki kynhun ki ban lamkhmat ha baroh saw tylli ki group lem bad ar tylli kiwei pat kiba kynsai kiba wan ha ka kyrdan ba-ar, kin ïoh rung sha ka wat kaba khatduh (final round), ka ban long ha u Naiwieng mynta u snem.
Te kumta kane ka lympung ka long ruh shi bynta ka jingpynkhreh na ka bynta ka 39th National Games ka ban long ha u snem ban wan ha kane ka Jylla.
