Shillong, Nailur 29
Ka India ka la khie im biang ha ka Asian Games ha kaba ka la ïoh ban khur biang sa ar tylli ki takma ksiar ha ka sngi kaba shiphew na ka bynta ban pynlong ïa kane ka ri ban jam sha ka kyrdan ba shiphew ha kaba ka la khur 53 tylli ki takma (6 ki ksiar, 21 ki rupa bad 26 ki rnong).
Kine ki ar tylli ki takma ksiar ki la wan lyngba ka shooting bad athletics. Ka Neeru Dhanda ka la lah ban pynpaw ïa ka jingtbit ha ka jingïakop siat suloi (women’s trap individual), hashwa ba ka kynhun ki ‘thei ïalehkai ka ri kin khur ïa ka jingjop ha ka 4x400m relay.
Lyngba kine ki ar tylli ki takma ksiar ki la pynkut noh ïa ka jingïai ap khmih lynti ka India ban ïoh rung sha ka thup kaba shiphew naduh ba ka la khur jingjop ha ka kabaddi ha ka 26 tarik mynta u bnai.
Kumba ka paw ka Dhanda ka la lah ban pynurlong ban khur ïa ka takma ksiar kaba nyngkong na ka bynta ka India ha ka Asian Games ha ka jingïakop siat suloi (women’s trap). Wat hapdeng ka jingwan hap u slap uba la pynthud ha ka bor ïohi, hynrei ka la long skhem ha ka rukom ïalehkai bad ka la lah ban siat haduh 28 sien ha ka final na ka bynta ban thaw rekod ha ka Asian Games. Kane ka long ka sien kaba nyngkong eh ban khur ïa ka takma ksiar ha kane ka lympung.
Ka India ka la khur ruh ïa ka takma ksiar ha ka jingïalehkai Athletics lyng -ba ka Kiran, Prachi Chou -dhary, MR Poovamma bad ka Vithya Ramraj ha ka 4x400m relay jong ki kynthei ha kaba ki la lah ban pyndep ha ki 3:29.69.
Na ka bynta ka Poovamma kaba la 36 snem ka rta, ka la long uwei pat u maw jam ha ka jingïaid lynti jong ka ha ka Asian Games hadien ba ka la don bynta ban khur ïa ka takma ksiar na ka bynta ka kynhun jong ka India ha u snem 2014 bad 2018.
Ka Vithya ka la lah ban bynrap ïa ka takma ksiar ha ka relay ha ka jingïakhun jong ka hadien ba la thaw rekod kham hashwa da ka PT Usha ha ki sawphew snem ha ka jingïamareh 400m hurdles.
Ka India ka la khur ruh ïa ki takma, ha kaba ka ‘thei ïalehkai ba dang 19 snem karta ka Pooja Singh ka la khur ïa ka takma rnong ha ka high jump hadien ba ka la lah ban kynthih ha ki 1.84m bad u Gulveer Singh uba khur takma rnong ha ka 5000m, ha kaba u la khur ruh ïa ka takma rupa ha ka 10,000m bad 1500m.
Ka India ka la khur ruh ïa ka takma rnong ha ka 4x100m mixed relay lyngba u Gurindervir Singh, Sneha Sathyanarayana, Animesh Kujur bad Harita Bhadra ha kaba ki la pyndep ha ki 41.06 sekhon. Kumjuh ka kynhun ki nongmareh 4x400m relay jong ki shynrang kata u Vishal TK, Dharamveer Choudhary, Jay Kumar bad u T Manu ki la khur ïa ka takma rnong da kaba pyndep ha ki 3:01.61.
Ha ka Shooting, ka India ka la khur ïa ka takma rupa ha ka women’s trap team, katba ki nongïakura ki la thikna ban khur lai tylli ki takma. U Narender u la khur ïa ka takma rnong hadien ba u la shah rem noh ha ka semi final (90+kg), katba u Parveen bad u Ankush Panghal ki la jam sha ka final.
Haduh mynta ka China ka dangïai bteng ban bat ïa ka kyrdan ba hakhlieh lem bad 254 tylli ki takma. Ïa ka kyrdan ba-ar la bat da ka Japan bad 183 tylli ki takma, katba ka South Korea bad ka Uzbekistan ki la khur 95 bad 44 tylli.
