Guwahati, Nailur:
Ka National Investi-gation Agency (NIA) ha ka sngi Ba-ar ka la pynlong ïa ka jingkhynra ha ki 16 tylli ki jaka ha kylleng ka Assam, West Bengal bad Kerala kum shi bynta ban tohkit halor ka jingkynnoh ba don ka jingthmu pyntriem sha shiliang pud, la ïathuh ki heh sorkar.
Katei ka jingkhynra, ka dei kaba don jingïadei bad ka jingjia Radicaliza-tion case ha Assam, kaba donkti ïa u Imam Mahmuder Kafila (IMK), kaba ki nongtohkit, ki la batai ba ka dei ka tnat jong ka seng Jamaat-ul-Mujahideen Bangladesh (JMB) kaba la shah ñiew beaiñ.
Na ki jaka ba la khynra, 10 tylli ki dei ha Assam, 5 tylli ha West Bengal bad kawei ha Kerala, ong ki heh sorkar.
Ki jingwad bniah ki long ban lum ïa ki sakhi kiba ïadei bad ki kam pynkhihwin ba la kynnoh bad ki jingïadei ba la suba ba ki don shabar ri kiba ïadei bad ka kynhun jong ka IMK.
Ki nongtohkit ki dang bishar bniah ruh ïa ki kam bad ki jingïadei jong ki briew shimet kiba la suba ba ki don jingïadei bad katei ka kam.
Ka kynhun NIA ka dang tohkit ïa ka jingkynnoh ba ka IMK network ka treikam ha Assam bad ka jingsuba ba ka don ka jingïadei bad ki kynhun ne ki riew shimet kiba treikam sha shiliang u pud u sam jong ka pyrthei.
La ap ïa ki jingtip ba bniah shaphang ki jaka ba la talasi, ki briew ba la kylli jingkylli bad kino kino ki tiar ba la lap ha ka por ba pynlong ïa ka jingkhynra.
