Lyngba u Arkibor & Damanbhalang pynliem ka Mawlai ïa ka MLP

Shillong, Nailur 29

Ka Mawlai SC ka la trei shitom ban pynliem ïa ka Meghalaya Police F.T da 2-0 kol ha ka lympung ïalehkai Shillong Premier League 2026 bad jam sha ka kyrdan ba-ar, ha ka sngi Ba-ar ha SSA Stadium, Polo.

Kane ka la wan lyngba ki kol ba la thep da u Arkibor Makhroh (3′) bad u Daman -bhalang Chyne (51′) na ka bynta ban pynlong ïa kane ka kynhun ban kamai 15 poiñ bad duna sa shi poiñ na ka Langsning kaba dangbat ïa ka kyrdan ba hakhlieh. Te kumta ka Mawlai ka la don ha ka kyrdan ban ïaknieh rah ïa ka nam lahduh, katba ka MLP ka dangsah ha ka kyrdan basan bad 10 poiñ, hynrei kan hap ban pynneh ïalade ban don ha ka ‘Top 6’ khnang ba kan ïoh ban shim bynta ha ka Champions Cup mynta ka aïom.

Ka kol ba nyngkong ba ka Mawlai ka la ïoh ban thep ka dei lyngba ka corner,  kaba hangne u Arkibor u la ïoh ïa ka kabu kaba paka ban pynkhih jar. Ha kane ka jingïakhun, la shem ba ki rangïalehkai ka Mawlai ki la ïaleh ban pynsted ïa ka rukom ïalehkai bad ka la buh jingeh ïa ki rangïalehkai ka MLP.

Hadien ba la ïoh ban thep ïa shi kol, ki rangïalehkai ka Mawlai ki la ïai bteng ban pynsted beit ïa ka rukom ïalehkai jong ka bad ban pyrshang pynkhih biang ïa ka jar, kaba hangne mih paw ka jingpyrshang na u Jestibor Mawlong.

Na ka liang ki rangïalehkai ka MLP ki la ïaleh katba lah ban pynsted ïa la ka rukom ïalehkai, hynrei ka bor met ka jong ki kam shym la ailad shuh ïa ki namar katba kin da lah ban pynpoi shakhmat ïa ka bol, ki rangïalehkai ‘dien ka Mawlai ki la lah ban beh lypa ban pynkhlaiñ ïa la ka kut ïalehkai jong ki.

Ha ka minit ba 45 u Damanbhalang u la tur shakhmat ban shut ïa ka free-kick ha kaba ka bol ka la sam lyngba ïa ki rangïalehkai ‘dien ka MLP bad u Basuklang u la lah ban pyllait na ka jingshah thep.

Haba bteng ïa ka kylla miet, sa shisien pat ka Mawlai ka la ïoh ban thep sa ka kol kaba ar, kaba hangne u Daman u la rah sha ‘box’ bad ka la ïoh ban thep kol.

Kumba ka paw haduh kaba kut kane ka jingïakhun, ka Mawlai SC ka dangshah thep tang shi kol ha kane ka samoi, namar ka jinglah ban ïeng skhem ki rangïalehkai ‘dien ryngkat u rangapkol u Lambhamiki Lamare.

Ka Mawlai kan jin da la dei ban thep bun kol ha kane ka jingïakhun, hynrei kam shym lah ban pynurlong ïa ki kabu ksiar kiba ka la ïoh.

Ka jingïalehkai mynta ka sngi Balang kan long hapdeng ka Rangdajied United FC pyrshah ïa ka Mylliem SC ha ka por 3 baje nohphai sngi.