Shillong, Nailur 30
Ka India ka la jam sha ka kyrdan ba phra ha ka Asian Games 2026, hadien ba ka la lah ban khur haduh 10 tylli ki takma ksiar ha ka sngi kaba khadwei lyngba ka kynhun ki nongsiat khnam (compound) bad kawei pat lyngba ka jingïakop siat suloi.
Hadien kane ka sngi, ka India ka la khur 60 tylli ki takma, ba kynthup ïa 10 ki takma ksiar, 21 ki rupa bad 29 ki rnong.
Ki nongsiat khnam compound ki la lah ban khur lai tylli ki takma ksiar, katba ka Neeru Dhanda bad u Kynan Chenai ki la bynrap sa kawei ka takma ksiar ha ka ‘mixed team trap’. Katba na ka boxing ka la khur lai tylli ki takma rnong bad u Sunil Kumar u la khur ïa ka takma rnong ha ka jingïalympat.
Kane ka jingïoh khur ka India ïa ki 10 tylli ki takma ksiar ka la pynlong ïa ka ban jam ar kyrdan na kaba shiphew sha kaba phra, katba ka Bahrain ka la wan ba hynñiew (11 tylli ki takma ksiar) bad ka Kazakhstan ka la wan ba khyndai bad 56 tylli ki takma, kynthup ïa 9 tylli ki takma ksiar.
Ha kawei pat ka liang ka China ka la bteng ban lamkhmat ha kane ka lympung da kaba khur 275 tylli ki takma (150 ksiar, 66 rupa bad 59 rnong). Ka Japan ka la wan ba-ar da kaba khur 199 tylli ki takma, katba ka South Korea ka la wan balai bad kamai 102 tylli ki takma.
Ki khlur nongsiat khnam (compound) ha kane ka sngi ki la khur ïa ki takma ksiar ha ka liang ki shynrang bad kynthei lem bad ha ka mixed team.
Ka Jyothi Surekha Vennam, Chikitha Taniparthi bad ka Prithika Pradeep ki la sdang da kaba khur ïa ka takma ksiar ha ka liang ka kynhun jong ki kynthei. Kane ka kynhun ka la pynliem ïa ka China ba la mihkhmat da ka Wunier, Yue Wang bad ka Fangyao Wei da 238-234. Kine ki lai ngut ki nongïalehkai ka India ki la lah ban khur ïa ka rekod ha ka pyrthei na ka bynta ban khur ïa ka nam lahduh.
Ka Chikitha bad u Sahil Jadhav ki la khur jingjop ruh sa ha ka Mixed Doubles hadien ba ki la jop ïa ki nongïalehkai na South Korea, katba ka Jungyoon Park bad u Choi Eun Gyu da 158-157.
Katba u Kushal Dalal, Sahil bad u Ganesh Mani Ratnam Thirumuru ki la lah ban pynliem noh ïa ki nongïalehkai na China, u Jiahao Liao, Jinyi Liu bad u Jingyu Shi da 238-237 ha ka liang ka jingïalehkai kynhun jong ki shynrang.
Ka Chikitha bad u Sahil ki la lah ban pynkut ïa kane ka sngi da ar ki takma ksiar. Ka jingjop kane ka kynhun (mixed team) ka la pynlong ban ïoh jaka sha ka Olympic na ka bynta ka India. Kumba ka long mynta ka India ka la long ka ri kaba nyngkong ban ïoh rung sha ka Los Angeles Olympics 2028 na ka kynhun ïalehkai, ka ban long ka sien kaba nyngkong ha ka Olympic.
Shuh shuh ka India ka la khur ruh ïa ka takma ksiar na ka jingïakop siat suloi (mixed team trap), lyngba ka Neeru Dhanda bad u Kynan Chenai. Kine ki shijur ki la lah ban kamai 34 kaba long ka rekod ha Asian Games.
Kane ka long ka takma ksiar kaba ar na ka bynta ka Neeru ha kane ka lympung hadien ba ka la khur jingjop kham hashwa ha ka jingïakop para marwei. Ka la lah ruh ban pynlong ïa ka India ban khur ïa ka takma rupa ha ka ‘women’s team trap.
Lyngba ki ar tylli ki takma ksiar bad kawei ka rupa, ka Neeru ka la long ka nongïalehkai ba kynsai jong ka ri India ha kane ka lympung, kaba dangïaid shakhmat.
