Shillong, Nailur 30
Haduh 184 ngut ki nongmareh kynthei bad shynrang ki la ïashim bynta ha ka jingïakop mareh ba la tip kum ka ‘5km World Heart Day Marathon’ ha ka sngi Ba-ar ha kane ka nongbah.
Ïa kane ka jingïakop la pynlong da ka Meghalaya Medical Services Association ha ka jingïatreilang bad ka Health City Hospital, Guwahati. Ka phang jong kane ka jingïakop ka long “Run for a Healthy Heart. Run for a Healthier Life,” da ka jingthmu ban pynsngew sha ki paidbah shaphang ka jingkordor jong ka jingkoit jingkhiah.
Ïa kane ka jingïakop la sdang ha ka por 5 baje mynstep na ka ophis DHS bad la kaweh ïa ka lama da u Dr Joram Beda, Commissioner and Secretary ka tnat ka koit ka khiah.
Ki lynti jingïakop mareh ki kynthup ïa ka Don Bosco Square, Dhankheti, Civil Hospital Junction, State Central Library bad Main Secretariat, shwa ban poi sha Khyndailad ha kaba la pynkut ïa kane ka jingïakop.
Ïa ka nam nongjop ha ka liang ki shynrang, la jop da u Kmenlang Dkhar uba la wan ba nyngkong, bud sa u Has Ningyar bad u Pyndoman Nongrum kiba la wan ba-ar bad balai. Katba ha ka liang ki kynthei, la jop da ka Barihun Kharjahrin, ha kaba la bud sa ka Dajes Syiemsad bad ka Nathalene Lyngdoh, kiba la wan ba-ar bad balai.
