Imphal, Nailur:
Uwei u briew uba la 48 snem ka rta u la shah kem ha ka kynhun National Investigating Agency (NIA) halor ka jingdonkti jong u ha ka jingshah pynbthei bom ha Tronglaobi Awang Leikai, Bishnupur distrik ha kaba arngut ki khynnah rit ki la ïap.
Ki riew kieng atiar ki bym shym la lah ban tip ki la leh ïa kane ka kam thombor ha ka 7 tarik, Ïaïong mynta u snem ha kawei ka ïing sah briew kaba don ha Tronglaobi Awang Leikai, ha Bishnupur distrik, Manipur.
Uwei u khynnah shynrang uba dang san snem bad ka para jong u kaba dang hynriew bnai ki la khlad noh katba ka kmie jong ki ka la mynsaw ha katei ka por.
Ka NIA ha ka kyrwoh jong ka, ka pynpaw ba u Thangmang Haokip, uba la don kumba 48 snem ka rta, uba na Churachandpur, Manipur, u dei “uba shah kynnoh ba ar ban shah kem ha katei ka kam, hadien u S. Palal Thadou Kuki, uba la shah kem ha ka 12 tarik Nailar, 2026, uba don mynta ha ka jingshah kem jong ka aiñ.”
Ka kyrwoh ka ong ba ïa ka case (RC-04/2026/NIA/IMP) la mudui nyngkong eh ha Moirang Police Station hadien ba ki lehnoh ki bym lah ban tip ki la pynbthei ïa u bom na rud lum ha Tronglaobi Awang Leikai, ha kaba ka la ther ïa ka kynroh jong kawei ka ïing sah briew, kaba la pynmynsaw ïa ki lai ngut ki dkhot jong kawei ka longïing ha kaba arngut napdeng jong ki, ki la khlad noh na ki jingmynsaw jur, kata ki arngut ki heprit. La lap ruh ïa kawei ka RPG ba la shna hi kaba khlem bthei hajan katei ka jaka.
Ka kynhun NIA ka la buh jingmudui biang ïa kane ka mukotduma ha ka 23 tarik, Ïaïong, 2026 katkum ki kyndon jong ka Bharatiya Nyaya Sanhita, the Explosive Substances Act and the UA (P) Act, bad ka jingdonkti jong u Thangmang Haokip ka la paw ha ka por ba la pynlong ïa ka jingtohkit.
Ka jingtohkit kaba kham bniah ka dang ïaid shakhmat ban lap bad kem ïa kiwei pat ki briew kiba donkti ha katei ka kam thombor bad ban pynthikna ïa ka kynhun kaba kham heh kaba don sha lyndet jong katei ka kam thombor.
Ka kynhun NIA shuh shuh ka la kynnoh ba u S Palal Thadou uba la shah kem nyngkong eh la kynnoh ba u dei u heh jong ka tnat pla tyngka jong kawei ka kynhun ba la shah ñiew beaiñ. Hynrei ka kyrwoh jong ka NIA kaba la pynmih ha ka sngi Ba-ar kam shym la kdew ba u Thangmang Haokip u don jingïadei bad kano kano ka kynhun lehnoh ne em.
Ka Manipur ka la don hapdeng ka jingeh naduh ka 3 tarik u Jymmang, 2023 bad katei ka jingeh ka la shim ïa palat 306 ngut ki mynsiem briew bad 49 ngut ki dang jah rngai katkum ka kaiphod jong ka sorkar kaba long haduh ka 31 tarik u Nailar.
