Shillong, Nailur 30
Ka Rangdajied ka la jam sha ka thup ba san ha ka Shillong Premier League, hadien ba ka la pynliem noh ïa ka Mylliem da 3-1 kol ha ka sngi Balang ha SSA Stadium.
Kane ka jingjop ka la pyntikna ïa ka RUFC ba kan ïai neh ha kane ka lympung, katba ka Mylliem pat ka la hap ban hiar kyrdan noh sha ka First Division namar kam pat shym la khur jingjop wat tang shisien ruh naduh ba sdang kane ka lympung.
Ïa ki kol na ka Rangdajied la thep da u Mebannangkiew Thabah (39), Pasborlang Khongli-kong (84) bad u Franky Dkhar (90+2), katba ïa ka shi kol na ka Mylliem la thep da u Shaibor Nongrum (71).
Da kane ka jingjop, ka la pyllait hi thiaw ïa ka Rangdajied na ka jingshah pynhiar kyrdan bad pynlong ïa ka ban kynthih na ka kyrdan kaba phra sha kaba san bad kamai 10 poiñ bad ban ïaryngkat bad ka MLP.
Ka jingïakhun ka long ba haba kut ka kylla step, ka Rangdajied ka la lah ban tam shwa da shi kol lyngba u Mebannangkiew.
Haba wan ban bteng ïa ka kylla miet, ka la kham shimpor ïa ki ar kynhun ba kin pyntyllun shakhmat ïa ka jingïakhun, hynrei dei tad ha ka khyllipmat kaba u Shaibor Nongrum ka Mylliem u la ïoh ia ka kabu kaba paka ban thep ïa ka kol ban pynïakhaid mar shi kol.
Hashwa ban wai ka Rangdajied ka la ïoh ban thep kol biang lyngba u Pasborlang bad kawei pat da u Franky Dkhar kaba dei artad ka penalty.
Ka jingïakhun mynta ka sngi Palei kan long hapdeng ka Langsning FC pyrshah ïa ka Shillong Lajong FC ha ka por 5 baje janmiet.
