Shillong, Risaw 01
Ka Nongkseh Sports and Cultural Club (S&CC) kan pynkhreh ban shim bynta ha ka I-League 3 2026-27 bad kan long ka kabu kaba biang eh na ka bynta kane ka kynhun ka ban ïakhun ha la ïing ha SSA Stadium, Polo mynta u bnai.
Ha kane ka lympung ka Nongkseh ka la shah pynngat ha ka Group-C kaba kynthup lang ïa ka Chhaygaon FC na Assam, Lakecity FC na Madhya Pradesh, Godavari FC na Andhra Pradesh bad ka Kuppuraj FC na Pondicherry.
Kane ka lympung ïalehkai I-League 3 ka dei na ka bynta ki kynhun kiba shah pynhiar kyrdan na ka I-League 2 lem bad kiwei pat ki kynhun kiba na ki jylla bapher jong ka ri.
Ka Nongkseh ka la ïoh jaka ban rung sha kane ka lympung ka la wan hadien ba ka la khur nam lahduh ha ka 5th Meghalaya State League (MSL 5). Kane ka klob ka la lah ban pynliem ïa ka Langsning FC da 2-1 kol ha ka jingïakhun final kaba la long ha u Jylliew mynta u snem.
Te kumta ka Nongkseh kan pynkhreh ïa ka jingïakhun kaba nyngkong pyrshah ïa ka Kuppuraj ha ka 22 tarik, kumjuh ïa ka Chhaygaon ha ka 24 tarik, ïa ka Lakecity ha ka 28 tarik bad ïa ka Godavari ha ka 30 tarik. Kine ki jingïakhun jong ka Nongkseh kin long ha ka por 5 baje janmiet.
