Shillong, Risaw 01
Uwei na ki nongñiah kali ba paw ka Jylla, u Aneesh Sangma u la wan ha ka kyrdan ba nyngkong, katba ka Phoebe Dale Nongrum ka la ïoh ban khur ïa ka nam ‘Best Female Driver’ ha ka jingïakop ñiah kali ba la tip kum ka 6th Rally of the Himalayas, kaba la poi sha kaba kut ha ka sngi Balang ha in Padum, Zanskar.
U Sangma ryngkat u paralok ba ïa ñiah lang, u Goutham CP ki la lah ban pynpaw ïa ka jingtbit kat haduh ba ki la wan ha ka kyrdan ba san haba kheiñ lang baroh. Katba ka Phoebe ryngkat uwei pat uba la shim bynta ban ñiah lang, u Shahid Salman, ki la wan ha ka kyrdan basaw ha ka kyrdan jong ka T3 Xtreme bad ba phra haba kheiñ lang baroh. Ka jingïoh ka Phoebe ïa katei ka nam ka la wan lyngba ka jinglah ban pynpaw ïa ka jingtbit ka jong ka ha kane ka jingïakop kaba long ranap lum kiba long kynjang na sla duriaw.
Ïa kane ka jingïakop la sdang ha Manali ha ka 26 tarik u Nailur. Kane ka jingïakop ka la sdang shwa da ka jingbishar bniah ïa ka jinglong jingman jong ki kali bad kiwei ki jingdonkam.
Ka jingplie ïa kane ka jingïakop ka la sdang na Gramphu sha Kaza lyngba ka jingshim bynta na ki nongñiah kali bapher bapher lyngba ka Kunzum La bad ka wah Lahaul-Spiti, kumjuh ki jaka ba long lum. Te kumta ka Phoebe bad u Salman ki la lah ban pynpaw ïa ka jingtbit ka jong ki ha kane ka jingïakop.
Ka sngi kaba ar ka la long na Kaza sha Gramphu, ha kaba ka la sangeh kumba ar kynta na ka jinghap ïor baroh shimiet ha kylleng ka Kaza, Losar bad Kunzum La, te kumta na ka liang ki nongpynïaid ki la hap ban buh shwa hakhmat na ka bynta ka jingbit jingbiang jong ki nongshim bynta na ka daw ka jingjur u thah. Kane ka la buh jingeh na ka bynta ka Phoebe bad u Salman ha ka ban ñiah kali.
Ka wat kaba lai ka la sdang na Darcha ha kaba la hap ban pynlyngkat ïa ka lynti ïaid na ki 77km sha ki 16km na ka daw ka jingjur ka jinghap ïor. Hadien kane ka kyrdan jingïakop, ka kynhun ka la poi sha Padum na ka bynta ban maramot ïa ka kali hashwa ban pynkhreh ïa ka wat kaba khatduh.
Ïa ka wat kaba khatduh la pynlong ha ka 30 tarik u Nailur, ha kaba ka la sdang na Padum bad pynkut ha Panzi La, ha kaba ki nongshim bynta ki la ïaid lyngba ki lum thah bad ka Drang-Drung Glacier. Hapdeng kine ki jingeh ba ki ïakynduh, ka Phoebe bad u Salman ki la lah ban pyndep ïa ka wat kaba khatduh da kaba wan ka kyrdan basaw bad baphra haba kheiñ lang baroh.
