Jowai, Risaw 01
Ka Mupliang Good Will, Mynsngat Ryntih bad Namdong Christian ki la rung sha ka quarter final ha ka lympung ïalehkai 2nd Division Football League ba la pynïaid da ka Thadlaskeiñ Sports Association (TSA), hadien ba ka la khur jingjop ha ka sngi Palei.
Ha ka jingïakhun pre-quarter final kaba la long ha Multi Sports Complex, ka Mupliang Good Will ka la pynliem noh ïa ka Mukhla Sohshrieh da 4-2 kol.
Ïa ki kol na ka Mupliang la thep da u Dering Phawa (66), Molify Sna (68,74) bad u Greatful Sna (73), hynrei ka Mukhla Sohshrieh ka la thep ar kol lyngba u Elbious Sari (4) bad u Anikis Suna (36).
Ha ka jingïalehkai kaba bud, ka Mynsngat Ryntih ka la jop da 2-0 kol ïa ka Kremmyrsiang bad kane ka la wan urlong lyngba u Rimiki Mynsong uba la thep ha ka minit kaba 59 & 62.
Ha kawei pat ka jingïalehkai ka Namdong Christian ka la pynliem ïa ka Mynkrem da 3-1 kol. Ïa ki kol na ka Namdong Christian Club la thep da u Dakyrmen Sungoh (12), Starwell Sungoh (67) bad kawei pat la ïarap pynbuh da ka liang pyrshah u Ïawanlangki Lamin (30). Katba ka Mynkrem ka la pynphai shi kol lyngba u Lamitre Khynriam (59).
