Shillong, Risaw 01
Ka Langsning FC ka la duh jingkyrmen ban bat biang ïa ka nam lahduh ha ka Shillong Premier League mynta ka aïom, hadien ba ka la mad ïa ka jingshah rem ha ka Shillong Lajong FC da 2-0 kol ha ka sngi Palei ha SSA Stadium, Polo.
Ïa kine ki kol la thep da u Iohborlang L Lyngkhoi (45′) bad u Freddy Jyrwa (80′) na ka bynta ban pynlong ïa ka Shillong Lajong ba kan kiew biang halor duh ka miej ïakheiñ poiñ hadien ba ka la khur 17 poiñ na ki phra sien ïakhun.
Kane ka jingjop ka Lajong ka la long ruh ka jingplie lad ïa ka Mawlai SC namar ka dangsah sa ar sien ïakhun bad lada jia ba ka lah ban khur jingjop ha baroh ar sien ïakhun ka la thikna ba kan rah ïa ka nam lahduh ha kane ka kynti.
Katba na ka liang ka Langsning FC ka sah satang kawei ka jingïakhun bad kata kan long pyrshah ïa ka Nongkseh SSCC.
Haba phai sha ka jingïakhun kam shym la shu kut tang ha ka jingïakhun ïa ka bol, hynrei la don ki khep ba sangah para met kaba jur bha hapdeng ki para nongïalehkai, kaba nangpynkhluit shuh shuh ïa kane ka jingïakhun.
Hynrei ka rukom ïalehkai hapdeng kine ki ar kynhun hi ka long ba ka Lajong ka la kham nion ha ka rukom ïalehkai bad kam shym la ailad ïa ka Langsning FC na ka bynta ban tehlakam ïa kane ka jingïakhun.
Ka jingïalehklai mynta ka sngi Thohdieng kan long hapdeng ka Mawlai SC pyrshah ïa ka Sawmer SC ha ka por 3 baje nohphai sngi.
