Shillong, Risaw 02
Ka Noble Art Boxing Club (N.A.B.C) ka la plie ïa ka jaka ïalehkai kilanmet hadien ba ka Raid Laban College ka la ai ïa ka kamra khnang ba ki khynnah kiba don sap ha kane ka kam ïalehkai kin ïoh ban pyntbit ïalade ha kane ka jingïalehkai.
Kane ka long ka sngi sah jingkynmaw ha ka shnong jong ka Riat bad Madan Laban hadien ba ki rang ïalehkai ïakura ne boxer barim bad ba la shongthait ki la mih shakhmat ban seng ïa katei ka klob ka ban long kum ka shlem ai jinghikai na ka bynta ki khynnah katei ka thaiñ.
Ïa kane ka wan ban plie da u MLA ka thaiñ bad uba long ruh u Myntri ka tnat Arts & Culture jong ka Sorkar Jylla u Bah Sanbor Shullai ha kaba la ïadon lang u Bah Loster Sun, President ka Riat Laban Dorbar Pyllun, Bah Larry Kharpran, Technical Director ka Meghalaya Boxing Association (M.?.?), Bah Alvin Shullai, President ka Noble Art Boxing Club, Bah Rishanlang Rynjah, Secretary ka Governing Body ka Raid Laban College, ki khynnah ïalehkai bad ki nongshong shnong.
Ïa ka kyntien maitphang haba ïadei bad ka jingsdang ïa kane ka shlem ai jinghikai la ïoh na u President u Bah Alvin Shullai.
Na ka liang u Bah Sanbor u la pynpaw ba ha ki por kiba mynshwa u la long uwei na ki nongïakura ha surok ne street fighter bad dei na kane ka daw ba u long uba sngewtynnad ïa ka boxing nalor kiwei pat ki jait jingïalehkai kiba u ju sngewtynnad ha ki por kiba u dang long u khynnah samla.
Ha kane ka sngi ka la don ka jingpynkup burom naduh ïa u kongsan bad kumjuh ïa ki nongshah khot sngewbha.
Kumba ka long ïa mynta ha kane ka shlem ki don kumba 30 ki khynnah kynthei bad shynrang kiba la leit ban shah pyntbit ïalade bad dang shen ki la don ruh ki khynnah ba la ïoh ban khur ïa ki takma ha ka jingïashim bynta ka jong ki ha ki rynsan ïakura ba long ha ka Jylla bad kine ki kynthup ïa ka Aisha Mawroh bad Alfinia Kharmujai, kiba la khur ïa ki takma ki jong ki na ka rynsan ïakhun jong ka Junior State Championship bad Senior State Championship ba la pynlong ïa ka da ka MBA, ïa kaba la pynlong pat ruh da ka jingpynkup burom ïa ki ha kane ka jingïalang.
Nalor kata la don sa lai ngut ki khynnah na kane ka shlem kita u Ethan Nongdhar, Amelamon Chulet bad Shanborlang Dkhar kiba la shah jied mynta ban ïadon bynta bad ka kynhun ïalehkai na kane ka jylla ki ban ïakhun sha ka rynsan ïalehkai U-14 National School Games kaban long naduh ka 23 haduh ka 28 tarik mynta u bnai ha nongbah Delhi.
Ïa ki kyntien ai khublei la ïoh na u Plielad Mawroh ba dei u Secretary jong kane ka shlem ai jinghikai.
