Shillong, Risaw 02
Ka Mawlai ka la lah ban jop da 2-1 kol ïa ka Sawmer ha ka SSA Stadium ha ka sngi Thohdieng, ha kaba ka la ïaid sa tang kawei ka jingïalehkai ban ïoh rah ïa ka nam lahduh jong ka Shillong Premier League 2026.
U Damanbhalang Chyne u la buh ïa ka Mawlai shakhmat ha ka jingïalehkai jong ka kylla step hadien ba u la thep kol lyngba ka bol ba la pashat na u Ricky Chyne. Katba ka Sawmer ka la ïakhun tyngeh ha ka kylla miet bad ka la pynïakhaid ha ka minit kaba 62 lyngba ka kol jong u Orestar Sad. Hynrei ka Mawlai ka la pynphai biang sa kawei ka kol ban ïoh syndon ïa ka jingjop ha ka minit kaba 76 ha kaba u nongïalehkai ba bujli u Jestibor Mawlong u la pyndonkam ïa ka jingbakla jong u nongapkol ka Sawmer u Urbanity Makhroh.
Ka Sawmer ka la jan pynïakhaid biang ha ki minit ba khatduh, hynrei ka jingpyrshang ba bunsien jong u Diego Khyriem bad u Orestar ki la shu kut noh khlem da lah pynurlong shisha.
Kane ka jingjop ka la pynwanphai biang ïa ka Mawlai sha ka kyrdan ba ha khlieh duh da kaba kamai 18 poiñ hadien ba la ïakhun ïa ki 8 tylli ki round, hakhmat eh ïa ka Shillong Lajong (17 poiñ), ka Langsning (16 poiñ), bad ka Nongkseh (13 poiñ). Ka Mawlai kan pynskhem ïa ka nam lahduh lada kan pynliem ïa ka Rangdajied United ha ka Sngi Thohdieng. Ka Sawmer ka dang sah ha ka kyrdan kaba hynriew da kaba kamai 9 poiñ.
Ha ka jingïakhun ban wan, ka Nongkseh kaba don ha ka kyrdan kaba saw kan ïakhun pyrshah ïa ka Laitkor mynta ka sngi Saitjaiñ ha ka por 3 baje janmiet.
