Nongstoiñ, Risaw 04
Ka Hynñiewtrep Youth Council (HYC) Maweit Circle kala ai por shitaïew ïa ki bar Jylla ki bym biang ïa ki kot ki sla kiba wan trei ha ki karkhana thang dewïong ha ki bynta bapher bapher jong ka thaiñ Maweit ha West Khasi Hills ba kin mih noh na kane ka thaiñ.
Ki Nongïalam ka HYC hapoh ka jingïalam u samla Shemphang Tyrsa, President bad u samla Lambor Paliar, President HYC Wahlyngdoh Area Unit, lem bad ki para dkhot ha ka sngi Saitjaiñ jong ka taïew ki la hiar sha ka Coke Factory kaba don ha Mawlangteh, Rimynniar.
Shuh shuh ki la ong ruh ba kane ka long kum shi bynta jong ka “Sier Lapalang Operation (SLO)” jong ka seng, bad ka jingthmu ka long ban leit khynra ïa ki kot ki sla jong ki bar jylla kiba trei ha katei ka Coke Factory.
Ki nongïalam HYC ki la ong, lyngba ka jingkhynra la lap ba ki kot ki sla jong ki bar jylla ki long kiba biang katkum ka jingkhynra jong ka seng.
“Lada phi peit ïa ka jingïaid lynti jong ka jingwan rung ki bar jylla ha ka jylla jong ngi, ka long kaba sngewsih, kumta ka seng lyngba ka SLO kan ïai bteng ban khynra ha manla ki jaka trei, ki jaka shong ki bar jylla, khnang ban pynthikna ba ki kot ki sla ki long kiba biang bad katkum ka ain,” ong ki nongïalam.
Shuh shuh ka HYC kala kyntu ïa ki trai Factory ba ki dei ban pynthikna ba kim dei ban wanrah ïa kino kino ki bar jylla khlem ki kot ki sla kiba biang.
Ki la ïathuh ruh ba katei ka jingkhynra jong ka seng kan ïai bteng ha baroh ka thaiñ jong ka Maweit Circle.
