Ka jingtrei shitom ka donkam ïa ka jingtheh syep theh syar ka bym kai ban ïoh ïa ka kamai ka kajih kaba bit ba biang bad ka bakhuid ba suba khlem da donkam ban shukor ban thok ïa ki para briew. Da ka jingtrei minot, ki don kiba la lah ban pynïeng ïa ki kam ki jam ha ki bynta bapher-bapher. Hynrei ynda la ïohi ba ka jingtrei shitom ka wanrah ïa ka spah ka phew, ki mih pat sa ki nongdawa bam ei ki bym kwah ban trei shitom wat tang shi tyrsim khmut ruh tangba kiba kmen ban ïoh bam ei ïa ka kamai ka jong kiwei. Kita ki nongseng kam seng jam, wat lada ki la trei shitom miet la bad sngi ban pynïeng ïa ka kamai ka kajih, kim banse ban sam sha kita ki nongdawa bam ei namar kim kwah ban mih kano-kano ka jingeh ha ka jingtrei jong ki. Kane ka dei kawei na ki daw bah kaba pynsalia ïa kiba bun ban tur sha ki kam lajong namar ka long kumba ki hap ban kamai na ka bynta kiwei bad ym ïalade bad ka ïing ka sem.
Ka jingjur jong ki nongdawa bam ei ka paw hadien ba ka Khasi Student’s Union dang ha kine ki taïew ba la lah, ka la pynpaw pyrthei ïa ki pulit kiba donkti ha ka kam khrong pisa beaiñ na ki trok kiba ïaid ha ki surok ha ka thaiñ Mawkhanu bad Thanglashai. Ngi ju sakhi ba ym dei tang kane kaba la paw thymmai hynrei la don bun bah kita ki khyrdop kiba ju pynïeng ha ki surok bah kiba ju khrong pisa beaiñ. Ha kaba na ka liang ki bor pynïaid district na ka por sha ka por ki ju leit ban khang khyrdep ïa kum kine ki khyrdop. Naduh ki por kiba mynshwa haduh mynta, ki trok ne kino kino ki kali kit mar ki ju hap ban siew beit ka pisa la ka long T.100, T.200 ne kumta ter ter. Don ki khyrdop kiba la pynïeng lyngba ka jingïoh jingbit na ki bor ba dei khmih hynrei don bun pat kiwei kiba pynïeng tang ban kamai spah ei khlem pynshitom da kaba knieh noh ïa ka umsyep jong kiwei.
Ka long ka jinglehraiñ ka bakhraw ban ïohi ïa kiba kum kine ki kam namar ngi sngewthuh ba la nang roi kita ki nongdawa bam ei ki bym kwah ban khih ban ksar, ban trei shitom, ban pynjaw syep pynjaw snam ban ïoh ïa ka kamai ka kajih ka bakhuid ba suba bad ka bym ktah ïa ki para briew. Ha kajuh ka por, sngewsynei ïa kita ki nongshah dawa namar ym shym la phah seng kam ïa ki ban bsa ei ïa ki nongdawa bam ei. Tangba dei tang ka jingbym banse ba ki hap ban sei na pla ba kin lait ïalade na ka saw ka sian, ka pang ka mynsaw. Kane ka jingkwah im ba heh ba haiñ da kaba pyndonkam ïa ka umsyep jong kiwei ka long kaba ma. Ka shu long ba kita ki nongdawa bam ei kim pat ïakynduh bad kiba kham shlur bad kiba nud ban kyrngah wat lada ki dawa sa da ki spah sien. Ynda ki la ïakynduh bad kiba kham shynrang ka mynsiem, hangta kin sa sngewthuh bad pei shkor ba pleng kam long kaba bha ban shu ap thap narud bad leh pahuh pahai da ka umsyep jong kiwei.
Ha kum kane ka khep jong ka jingmih paw kita ki jinglap ba ka la don kata ka jingkhrong pisa beaiñ, hap ban tip pat hato ka dei kaba ki leh hi ne ka dei kaba la ïoh jingbthah na kiba halor. Ngi hap ban dawa ïa ka jingpynshai kaba bniah bad ruh ba ka jingtohkit halor kane ka kam, ka dei ban long beit da ka kynhun kaba laitluid. Lada tohkit uba heh ïa uba rit haduh katno kata ka hok kan shai. Mano ki ban ïahap. Donkam beit ban don ka jingtohkit laitluid ba kiei kiei baroh kin long kiba shai bad kiba khuid.
