Shillong, Risaw 04
Ka Dorbar Shnong Nongjri ha ka 03 tarik u Risaw, 2026, ka la thep da ka FIR ha Nonghyllam Police Station, South West Khasi Hills District, pyrshah ïa ki jingkynthoh pynbudnam, byrngem bad kynnoh bam briew ha ki YouTube bad WhatsApp.
U Bah Badonbok Shylla, Secretary lyngba ka kyrwoh ba la phah sha ki lad pathai khubor, u la ong ba na ka daw ka jinglap ïa ki metïap jong ki shijur ha ka 29 tarik u Nailur, 2026, ha rudnong ka shnong Nongjri, ki la mih pynban ki jingkynnoh ba lai-phew jait ïa ki Lyngngam bad ki nongshong shnong ha ka thaiñ.
U la ong ba kum Dorbar Shnong, ka ïatreilang bad ka aiñ bad mar ïa ïoh jingtip halor ka jingjah rngai ki ar ngut ha ka 26 tarik u Nailur, 2026, ka la pynlong ka jingwad ïa ki, tad haduh ban da shem ba ki la ïap noh.
Shuh shuh u la ong ba ki bahaïing jong ki ar ngut, ki la rah ïa ki metïap khlem da don ka jingkynnoh ïa ka shnong ne ki nongshong shnong, hynrei la paw lai ngut kiba kynnoh khlem nongrim.
Kum ban shu kdew, ba ki ar ngut ïa kiba la lap tang ki metïap la ithuh, u Bah Kop Lapang, 32 snem ka rta uba dei na Umsaw, Ri Bhoi District bad ka Kong Aijingsuk Kharbani, 23 snem ka rta na Pongkung, East Khasi Hills, kiba dei shi kurim, ong ka kyrwoh na ki bor pulit.
La ong ba ki pulit ka Mawsynram Police Station, ki la ïoh pdiang jingujor myn ha ka 28 tarik u Nailur, 2026, kaba kdew halor ka jingjah kitei ki ar ngut na ka jingleit ïew Nongjri myn ha ka nohphai sngi ka 26 tarik u Nailur, 2026, kumba ha ka por 3 baje ei-ei.
Dei tad haduh ka por 1 baje nohphai sngi jong ka 29 tarik u Nailur, 2026, la don kiba pyntip halor ka jinglap ïa ar tylli ki metïap ha katei ka shnong, ha kaba la ithuh ba kidei jong ki shijur da ki bahaïing.
Kumba long ïa kane ka jingjia lap metïap, ki bor pulit ki dang pynlong ka jingtohkit kaba bniah, ban lap ïa ka jingshisha.
U Bah Badonbok Shylla u la bynrap, haba ïadei bad ka jingshah kynnoh, ka shnong ka la dawa na ki bor jong ka aiñ ba kidei ban shim ka sienjam ban pynshitom ïa kiba kum kine ki briew.
“Kane ka jingkren jemdaw, kren pynthohbria, kren tohmet , ka la ktah shisha ïa ka burom ka ijot jong ka shnong ka thaw jong ngi ha Nongjri,” u la ong.
