Shillong, Risaw 04
Ka lympung ïalehkai Asian Games 2026 ka la poi sha kaba kut ha ka sngi U Blei hadien ar taïew ba la lah ban pynlong ha Japan.
Ïa ka jingïalang pynkut ïa kane ka lympung la pynlong ha Nagoya City Mizuho Park Athletic Stadium kaba ha Nagoya. Na ka liang ka Olympic Council of Asia (OCA) ka la pynkhamti ha ka Qatar na ka bynta ban pynlong ïa ka Asian Games 2030 ha Doha.
Ka OCA ka la kam ba ka Aichi-Nagoya Asian Games ka la mad ïa ki katto katne ki jingeh ha ka jingtreikam, hynrei ka la ong ha ka sngi U Blei ba ki bor pynïaid ki la lah ban ai ïa ka bha tam na ka bynta ki nongïalehkai.
Ïa kane ka lympung la pynhap pyrda da u President ka Olympic Council of Asia u Sheikh Joaan bin Hamad Al Thani.
Lah ban kdew ba ka India ka la wan ha ka kyrdan basaw da kaba khur 85 tylli ki takma, kiba kynthup ïa 21 tylli ki takma ksiar, 27 ki takma rupa bad 37 tylli ki takma rnong. Ïa ka nam lahduh la rah da ka China kaba la khur 288 tylli ki takma (154 ki takma ksiar, 78 rupa & 56 rnong). Ïa ka kyrdan ba-ar la ïoh da ka Japan kaba la khur 217 tylli ki takma (59 ki takma ksiar, 79 ki rupa bad 79 ki rnong). Ï aka kyrdan balai la ïoh a ka South Korea kaba la khur 113 tylli ki takma (30 ki takma ksiar, 53 ki rupa bad 30 ki rnong).
