Shillong, Risaw 04
Ka Jylla ka la kyntu ïa ka Sorkar Pdeng ba kan pynstet ha ka ban thaw ïa ka Games Technical Conduct Committee (GTCC) na ka bynta ka lympung ïalehkai 39th National Games 2027 bad ban pynbiang ïa ki lad jingïarap ha ka jingbei tyngeh.
Ïa kane ka mat la rah da u Myntri ka tnat ïalehkai ka Sorkar Jylla u Bah Wailadmiki Shylla ha ka jingleit ïakynduh ïa u Myntri ka Sorkar Pdeng ba dei khmih ïa ka tnat ïalehkai u Dr Mansukh Mandaviya ha ka ïingsah ka jong u ha ka sngi Saitjaiñ ha nongbah Delhi.
Ïa u Bah Shylla la synran lang da u Working President ka Meghalaya State Olympic Association (MSOA) Bah John Kharshiing. Kane ka jingleit ïakynduh u Bah Shylla ka long hadien ba u la wanphai na ka jingleit sakhi ïa ka 20th Asian Games ha Aichi-Nagoya, Japan lem bad kiwei pat ki hynñiew ngut ki ‘official’ kiba na tnat ïalehkai bad ki nongïalam ka MSOA.
Haba pynpaw shaphang katei ka jingïalang, u Bah Shylla u la ong, “Ngi la ïoh ban ïamir jingmut ha kaba ïadei bad ka jingpynkhreh jong ka 39th National Games Meghalaya 2027, kynthup ïa ka jingdonkam na ka bynta ka IOA ba kan thaw noh kham kloi ïa ka GTCC. Kane kan ïarap ïa ngi ban tip ïa ki jait jingïalehkai bad ban pynbeir ïa ki.”
Halor ka jingmang pisa, utei u Myntri u la ong ba u Myntri ka Sorkar Pdeng u la pdiang ïa ka jingkyrpad jong ka Jylla.
“Ngi la pan jingkyrshan pisa shuh shuh na katei ka tnad jong ka Sorkar Pdeng. U la kynti ïa ngi ban aiti shuh shuh ïa ki kot ki sla bad u la pynthikna ba yn pynbeit ïa ka jingïalang bad ki heh ophisar jong ka tnad ïalehkai bad ki nongmihkhmat jong ka IOA,” la ong u Bah Shylla.
Ka GTCC ka long kaba kongsan bha namar ka ïarap ban pynbiang ïa ka thup jong ki jait jingïalehkai ban shah pynrung ha ka National Games, ka ban ailad ïa ka Jylla kum ka nongpdiang ban sdang ïa ki jingtei bad ki jingpynkhreh ha ka por kaba biang.
