Shillong, Risaw 04
Ia ka met basah jong i khyllung ba dang 3 snem ka rta iba la khlad noh ha shiteng lynti, iba la tip kyrteng i Habankyrshan Marbaniang, la leit ontep noh ha ka 03 tarik u Risaw, 2026, hapdeng ka jingsngewkhia ïa ka daw jingkhlad jong i.
Halor kane ka jingkhlad noh jong i khyllung ha shiteng lynti, ka la mih bun ki jingkynnoh, ba ka dei hi ka jingleh klet ka Sorkar ban phai khmat sha ki thaiñ nongkyndong, la ka long ha ka jingpynïasoh surok lane ki lad ai jingsumar ha ka koit ka khiah.
Ka jingjia khlad noh i khyllung ba dang 3 snem ha ka step 01 tarik u Risaw, 2026 ha shiteng lynti na Domkyrkoh sha Mawdet, kata hapdeng ka jingbeh sumar ïa i da ka kmie bad u kpa kiba hap ïaid kjat namar bym don ka surok kaba bha, ka la wanrah ka jingïakren, ba sa katno sien kum kine ki jingjia kin dang jia lada ka Sorkar kam phai khmat ban pynbha ïa ki lynti syngkien bad jingpynïasoh surok sha ki thaiñ nongkyndong.
Ban poi sha ka shnong Domkyrkoh ha Rambrai-Jyrngam Konstitwensi, kam dei kaba suk lait noh da kaba ïaid kjat bad pyndonkam da ki kali Pick-Up, kiba hap ïaksaid ha ka lynti khyndew.
Lah ban kdew ba ha ka miet 30 tarik u Nailur, 2026, ka kmie bad u kpa ki la phone kali ban wan shaw ban leit rah sumar ïa i khyllung ba u shitom, hynrei ki nongñiah kali ki kyntait ban hiar shaduh Domkyrkoh namar ka jingsniew ka surok khyndew sha katei ka shnong.
Ki la phah wan da ka kjat ïa ki ha Mawdet, hynrei namar ka miet, ka kmie u kpa ki la buhteng noh bad wan beh noh ha ka step kaba bud ha kaba itei i khyllung i la khlad noh ha lynti hapdeng ka jingïaid kjat bad kumta ki la hap ban phai biang noh sha shnong.
Dang ha ka 02 tarik u Risaw, 2026, ka VPP West Khasi Hills District kaba la hiar sha katei ka shnong ban leit ai mynsiem bad ai jingkyrshan ïa ka longïing kaba la duh ïa itei i khyllung, ha kaba ka la pynpaw ba ka Sorkar MDA ha ka jingïalam ka NPP, kam dei ban kren heh nia halor ki surok tang ha ki por ilekshon hynrei kadei ban pyni da ki kam.
Ka long ka jingjia kaba pynsngew pangnud bha ban ïohi ba ka kmie bad kpa ki hap ban ïaid da ka kjat bad kit ïa i khyllung iba don hapdeng ka jingpang kaba jur, ha ka lynti kaba shim por kumba 3 haduh 4 kynta, bad hap duh noh ïa i khun tang shiteng lynti, tang namar ka jingbym don ka surok kaba biang.
