Shillong, Risaw 04
Ka Nongkseh SSCC ka don ha ka thong jingïaknieh ïa ka nam lahduh ka Shillong Premier League 2026, hadien ba ka la lah ban pynliem noh ïa ka Laitkor SC da 3-1 kol ha ka sngi Saitjaiñ ha SSA Stadium, Polo.
Kane ka nam jop ka la wan urlong lyngba u Hardy Cliff Nongbri (55′), Dawanchwa Challam (81′) bad u Shano Tariang (90’+5), katba ka Laitkor SC ka la lah ban pynphai kylla shi kol lyngba u Shelbilkstar Kharshilot (87′).
Da kane ka jingjop, ka Nong-kseh ka la ïaryngkat mar 16 poiñ bad ka Langsning FC, hynrei ka la tam lyngba ka jingïapher ha ka jingthep kol (+12 la +10) na ka bynta ban wan ha ka kyrdan balai. Te kumta kine ki kynhun kin hap ban pynkhreh ïa ka jingïakhun ba khatduh ha ka 10 tarik mynta u bnai.
Katba na ka liang ka kynhun ïalehkai ka Laitkor, ka ïai neh ha ka kyrdan kaba khyndai hadien ba ka la lah ban khur 6 poiñ bad sah satang kawei ka jingïakhun ka kan pyndep.
Haba phai pat sha ka jingïakhun, kampher wat lada kan dei ka jingshah rem kaba hynriew, pynban ka Laitkor ka la ïalehkai bha, kaba pynlong ïa ka Nongkseh ba kan shem jingeh bha ba kan wanphai suk bad ka jingjop napdeng ka madan ïakhun.
Ka Nongkseh kaba sngewthuh bha ïa ka dor jong kane ka jingïakhun, ka la kyntiew bha ïalade ha ka rukom ïalehkai bad ha kum kane ka por ba ka la ïoh ba kan pynkhih jar nyngkong hadien ba u Mebankhraw Wahlang u la lah ban kynthih kham halor ban pyndei da ka khlieh ïa ka bol ïa kaba la lah shwa ban kyrda ïa ka, hynrei ka bol kan poi hajan u Hardy bad daiñ u la khyrwit ban pynkhih ïa ka jar.
Kane kan dei ka kol ba hynriew ba u Hardy u la thep ha kane ka samoi ïalehkai ka SPL bad kylla long u rangïalehkai ban thep bun tylli ki kol ha kane ka samoi ba mynta.
Hadien kane, satang kumba 10 minit ba sah jong ka por ïakhun, ka Laitkor SC ka la shem ba kan shah tam pat da ar kol, kaba wan hapdeng ka jingïabakla ki rangïalehkai jong ka ban ïaknieh ïa ka bol, kaba la plie lad biang ïa u Hardy ba un rah shakhmat ïa ka bol bad ban pynbuh na ka bynta u Shano Tariang, uba la shut jam bha ïa ka bol kaba la poi pat sha u Dawanchwa, u bym shym la pynlehnohei ïa kane ka kabu ksiar.
Pynban ka jingïakhun ka la lam shaba itynnad bha hadien ba ka Laitkor ka la ïoh ïa ka kabu ba kan thep shi kol, kaba la wan ha ka dur ka free-kick ba la shut da u Shanborlang Nonglait uba la lah ban pynpoi ha ‘box’ bad u Shelbilkstar u la ïoh ban thep da kaba suk.
Namar ka jingïakhun ka long kaba ïakhaid, kam lah ban khlem da pynrah mynsiem ïa ki rang ïalehkai shong ben ka Nongkseh, namar ki sngewthuh ba lada ka Laitkor SC ka lah ban pynïakhaid, kan long kumba theh umpjah ïa kane ka kynhun, hynrei ha madan pat, ki rangïalehkai ka Nongkseh ki la ïeng ïada bha ïa la ka jong ka kut, bad u Shano Tariang u la ïoh ban lam lynti ban thep ïa ka kol kaba lai.
Ka jingïalehkai ka ban wan jong kane ka lympung kan long ha ka sngi Ba-ar hapdeng ka Nangkiew Irat kaba don ha ka kyrdan ba phra, pyrshah ïa ka MLP FT kaba don ha ka kyrdan ba hynriew, ha ka por 3 baje nohphai sngi.
Kumba ka long mynta ka Nangkiew Irat (8 point) kam pat lah ban lait na uta u lain jong ka jingma (relegation zone), ha kajuh ka por ka don ïa kawei pat ka thong ban ïakhun na ka bynta ban ïoh rung sha ka thup ‘Top 6’, ka ban plie lad ïa ka ban ïa aireng ha ka SSA Super Cup ka ban sa long shen.
