Yemen, Risaw:
U nongïalam jong ka Yemen, ha ka Sngi U Blei, u la pynbna ïa ka jingsdang jong ka jingphah leit tur da ki shipai ban ioh kurup biang noh ïa baroh ki bynta ba la ioh bat da ki lehnoh Houthi jong ka Yemen, wat haba katei ka kynhun ka la ïoh ïa ki jingmyntoi ba thymmai ha ka jaka, da kaba ker sawdong ïa ka nongbah ba la bat da ka sorkar.
Ka jingpynbna ka buh ïa ka thong kaba khraw na ka bynta ka sorkar kaba la shah pynïap, kaba dang shen ka la duh ïa ki bynta kiba heh jong ka rud duriaw Red Sea jong ka ri bad ki jaka sawdong ka Bab al-Mandab Strait, ka jaka khanglad ïa ki liengsuiñ shabar ri, hadien ka jinghiar thma kaba jur bha da ki Houthis ba la kyrshan da ka Iran.
Ka sorkar Yemen, ka la ialeh ban pynduna ïa katei ka jingkiew, wat da ka jingkyrshan shipai jong ka Saudi Arabia, ha kaba ki Houthi ki la ong ba ki la hiar thma biang ïa ki jaka shna umphniang ha ka nongbah ha ka sngi U Blei.
“Nga pynbna mynta ka sngi ïa ka jingsdang jong ki kam shipai ban shim biang ïa ki jaka ba dang sah jong ka ri bad ban pynïar ïa ka bor synshar jong ka jylla bad ki jaka treikam jong ka ha kylleng ka ri baroh kawei,” ong u Rashad al-Alimi, u khlieh jong ka dorbar president jong ka Yemen ha ka kyrwoh.
U Alimi u la khot ïa baroh ki shipai “ban sdang ban pyndep ïa ki kam ba la aiti ha ki, katkum ki jingthmu ba la mynjur, tad haduh ba ka ri kan lait na ka jingshah teh ha ki lehnoh Houthi”.
Kane ka jingpynbna ka la mih tang katto katne kynta hadien ba ki Houthi ki la ot ïa ka lynti pynpoi marbam kaba kongsan bha kaba pynïasoh ïa ka nongbah Taiz kaba la shah ker kut bad ka nongbah ba shipor jong ka sorkar ka Aden, ong ka khubor na ki saw tylli ki tyllong khubor pahara.
Ka jingkiew jong ki Houthi ka la long hadien ka jingïaleh kaba jur kaba la bun sngi hapoh bad sawdong jong ka nongbah.
“La pyntip ïa ngi, ba ki Houthi, ki la shimti ïa ka jaka jong ka al-Safiya, ha kaba ki la ot ïa ka surok bah bad ki la shimti ïa ka ktem pulit,” ong ka tyllong khubor jong ki pulit ha katei ka thaiñ, ha ki nongthoh khubor ha katei ka jaka.
Lai tylli ki tyllong khubor kiba don bad ki shipai Yemen ki la pynthikna ruh ba ki Houthi ki synshar ïa katei ka jaka bad ka lynti pynpoi marbam, ha kaba ka jingïaid kali ha shilynter ka surok ka la sangeh bad katei ka kynhun mynta ka la ker sawdong ïa ka nongbah Taiz.
