Shillong, Risaw 05
U MLA ka North Shillong Bah Adelbert Nongrum ha ka sngi Nyngkong u la dawa ïa ka jingtohkit da ka CBI halor ka jinghiar khynra ki pulit ïa ka ophis ka KSU ha ka 19 tarik Nailar, da kaba kdew ïa ka jingsiat pathar ïa ki tyndong lyer pynsat khmat hajan ka Hospital, ka jingwan rung ki pulit tap durkhmat khlem ki ‘nameplate’ bad ka jingkren ïa ki ktien khlem akor.
Ha ka dorkhas ïa kaba la aiti ha ka sngi Nyngkong sha u Symbud Myntri Rangbah ka tnad Kam Pohïing Bah Prestone Tynsong, u Bah Adelbert u la ong ba ka Sorkar ka dei ban thung ïa ka jingtohkit kaba khuid lym kumta kan pynbor ïa u ban mudui sha ki bor ka aiñ ba kham halor. Ïa ki kot ki sla la aiti sha ki phra tylli ki borkhmih ba kynthup sha u Myntri Rangbah, u Chief Secretary, Director General of Police (DGP), bad ruh sha ka National Human Rights Commission (NHRC) bad ka Meghalaya Human Rights Commission (MHRC).
U MLA u la ong, ïa ki kot ki sla jong u la kyrshan ruh da ki dkhot ka Seng Samla Jaiaw Pyllun (SSJP) kiba la don ha madan ha katei ka por ba pynlong ka jingkhynra.
Katkum ka kaiphod jong ka SSJP, kumba 15 round ki tyndong lyer pynsat khmat la siat ha ki jaka sah briew kaba don marjan ka H Gordon Robert Hospital, kaba buh ïa ki nongpang ha ka jingma bad pynrit mynsiem bad pynshitom ka ring mynsiem hapdeng ki nongshong shnong.
U Bah Adelbert u ïathuh ha ki lad pathai khubor ba ki pulit kila ïaid lait ïa ki bor shnong.
“La ïaid lait ïa ki bor pynïaid shnong. Ki pulit ki la kieng tiar bha ki la rung sha ki shnong jong ngi ha ka por shiteng miet, kiba la tap durkhmat, khlem don ruh wat ki ‘nameplate’ bad ruh kiba la kyntait ban pyni ïa kino kino ki hukum ne jingbthah ban pynlong ïa kane ka jingkhynra,” u la ong.
U la kynnoh ruh ba ki durkhih (video) ba la ring bad ïoh na katei ka jaka, ka pyni ba ki pulit kila pyndonkam ïa ki ktien khlem akor pyrshah ïa ki nongkitkam ka SSJP bad pyni bor ruh ïa ki samla ka thaiñ.
“Kine ki jaka sah briew kim dei ki madan thma, bad ka jingwan pynibor ïa ki nongshong shnong jong ngi ka dei ka bym lah satia ban pdiang,” u la ong.
Ka dorkhas kala kdew ruh ïa ka jingbym ïahap ka rukom treikam ki pulit, katba ki pulit kila jah ha ka por ba ïaid rally ka KSU ha ka por mynsngi jong ka 19 tarik Nailar, la lum lang ïa ki pulit ba tap durkhmat ha ka por mynmiet ban pynlong ïa ka jingkhynra sha ki jaka sah briew.
Haba kdew ïa ka jingjia ha Them Metor ha u snem 2018, u Bah Adelbert u la ong ba ki shnong kiba hap hapoh ka 17-North Shillong kila sakhi ïa kijuh ki jingsiat pathar ïa ki tyndong lyer pynsat khmat sha ki jaka sah briew.
“Kiba bun ki samla Khasi kila shitom shirta, don sah ka jingsyier kynthup ki briew kiba la duh wat ïa ka khmut bad ki bynta jong ka met namar ka jingbthei ki jingsop nalor ba bun ki nongshong shnong kila mynsaw na ka jingshei ki kuli pellet,” u la ong bad bynrap ba haduh mynta kam shym la don ka jingsiew bai lutksan ne jingïarap ïa kine kiba mynsaw.tohkit
