Shillong, Risaw 05
U Myntri ka tnad ka koit ka khiah, u Bah Wailadmiki Shylla ha ka Lah Sngi U Blei u la ong ba ïa ki ‘seat’ MBBS mynta yn bhah beit thik katkum ka jingtbit ne ‘merit’ hapoh ka SOP kaba thymmai khnang ban lait na kino-kino ki jingkynnoh haba ïadei bad ki jingbymbiang.
U Bah Wailad u la ong ba ïa kane ka SOP la wanrah hadien ki jingujor ba la dep ba ki kyrtong kiba duna ‘score’ ki ïoh ïa ki kolej kiba kham bha katba kiba heh ‘score’ ki shah iehnoh shadien.
“Hashuwa, kam shym la don ka SOP. Ki samla pule kiba ïoh duna ‘mark’ ki ïoh ïa ki kolej kiba bha, katba kiba ïoh ïa ki ‘mark’ ba bha, kim ïoh ïa ki kolej kiba bha. Dei na kata ka daw ba ngi la wanrah ïa kane ka SOP, ha kaba ïa ka bhah la leh beit katkum ka jingtbit ne ‘merit’,” u la ong.
Halor ki kynrum-kynram mynta u snem, u Myntri u la ong ba la pynpaw ïa ki jingsngewkhia ha ka ‘Counselling’ kaba nyngkong, ha kawei ka liang, kaba la pynlong pat ïa ka tnad ban pynlong biang ïa ka kylla kaba ar.
“Ki la don katto-katne ki jingsngewkhia na ki samla pule bad ki kmie ki kpa ha ka sien kaba nyngkong. Ban pynlong ïa kane kaba ïaid beit, ngi la khot ïa ka ‘Counselling’ kaba ar bad bud ruh ïa ka SOP kaba biang,” u la ong.
Hapoh kane ka rukom treikam, u la ong, ki samla pule ki ïoh lad ban jied ïa ki kolej ha la ki pali katkum ka kyrdan ‘merit’ jong ki.
“Katkum ka ‘merit’ jong ki, ki dang ïoh ïa ka lad ha la ki pali ban jied ïa ki kolej jong ki,” la bynrap u Bah Wailad.
