Gangtok, Risaw:
U Myntri Rangbah ka Sikkim, u Prem Singh Tamang ha ka sngi Saitjaiñ, 3 tarik u Risaw u la sam ïa ka jingïarap pisa hapoh ka Sikkim Aama Sashaktikaran Yojana sha ki nongïoh jingmyntoi na ka thaiñ Rhenock, ha kaba 1,169 ngut ki longkmie ha ka thaiñ ki la ïoh jingkyrshan hapoh ka jingthmu pynkup bor jong ka sorkar jylla ïa ki kynthei.
U Tamang uba dei ruh u MLA ka Area u la leit ban ïashim bynta ha ka jingïalang sam Cheque ba la pynlong da ka tnat Women, Child, Senior Citizen bad Divyangjan Welfare ha Titribotey kaba don ha Rorathang.
Ka Sikkim Aama Sashaktikaran Yojana ka dei ka jingthmu jong ka jylla baroh kawei kaba thmu ban kyntiew ïa ka imlang sahlang jong ki longkmie bad ban pynkhlaiñ ïa ki rukom kyrshan ïa ka ïing ka sem. Hapoh kane ka skhim la ai jingïarap pisa ïa ki 32 hajar ngut ki longkmie ha kylleng ki 31 tylli ki konstitwensi bad ki Sangha lyngba ki Block Administrative Centre bapher bapher.
Haba kren ha katei ka jingïalang, u Tamang u la pynpaw ïa ka jingnoh synñiang jong ki longkmie sha ki longïing bad ki imlang sahlang bad u la ong ba ka jingpynkupbor ïa ki kynthei kan ïarap ban pynlong ïa ki longïing bad ki imlang sahlang kiba khlaiñ.
U la ong ba ki don 1,169 ngut ki nongïoh jingïarap na Rhenock konstitwensi kiba ïoh jingïarap hapoh katei ka skhim bad kyntu ïa ki ban pyndonkam hok ïa ka pisa bad na ka bynta ki jingthmu kiba pynmih jingmih.
U Myntri Rangbah ka jylla ula ong ruh ba ïa ki nongïoh jingmyntoi kiba pyndonkam bha ïa ka jingïarap lah ban pyrkhat ban ïoh jingithuh hapoh ka Aama Samman Puraskar bad ka Pragatisheel Aama Puraskar ba dang shu wanrah thymmai, ba la seng ban ithuh ïa ka jingkiew bad jingnoh synñiang jong ki longkmie.
U Tamang u la pynbna ba ka jingpynbiang ïa ka Aama Sashaktikaran Yojana yn pynïar na ka 32,000 sha ka 50,000 ngut ki nongïoh jingmyntoi naduh u snem 2027.
La khmih lynti ba palat 1,500 ngut ki longkmie na kawei ka konstitwensi kin ïoh ïa ka jingpynbiang hapoh kane ka prokram ba la pynïar.
U la kyntu ruh ïa ki nongïoh jingmyntoi ban pynthikna ba ïa ki skhim sorkar yn pyntreikam hok bad u la ai jingmut ïa ki briew ban ym shim ïa ki jingmyntoi na ki skhim kiba bun haba kim dei hok, da kaba ong ba kane ka lah ban khanglad ïa ka jingïarap ban poi sha ki nongïoh jingmyntoi kiba la thmu.
Haba pynpaw ïa kiwei pat ki jingthmu jong ka sorkar na ka bynta ki kynthei bad ki khynnah, u Myntri Rangbah ka jylla u la kdew ïa ki prokram ba kynthup ïa ka Aama Sahayog Yojana, Bahini Yojana, Enhanced Widow Pension, Mission Vatsalya, Sabbatical Leave initiative, Maternity Leave, Sishu Samridhi Yojana, Shravan Kumar Award, Aama Didi Bahini Bus Sewa, Breastfeeding Pods bad HPV vaccination kaba shu ïoh ei.
U la pynpaw ruh ïa ka bynta jong ki Self-Help Group (SHG) ha kaba kyntiew ïa ka jingim, ka jingseng kam seng jam bad ka jingkiew ha ka imlang sahlang ha ka kyrdan ba shapoh.
U Tamang u la ong ba la thaw ïa ki lad kamai bad ki lad pyntbit ha kylleng ka distrik bad u la ban jur ïa ka jingdonkam ban wanrah ïa ki jaka kiba sboh bad ki bym pat pyndonkam hapoh ka jingrep kaba pynmih jingmih ban kyrshan ïa ka rep ka riang bad ban pynsuk ïa ka jingim.
U Commissioner-cum-Secretary jong ka tnad Women, Child, Senior Citizen and Divyangjan Welfare Department, ka Jigmee Dorjee Bhutia, u la ong ba ka Aama Sashaktikaran Yojana ka long ban pynkhlaiñ ïa ka jinglong laitluid jong ki kynthei ha ka ïoh ka kot, ka jinglah ban shaniah ha lade bad ka jinglah jong ki ban noh synñiang sha ka bha ka miat jong ka ïing ka sem jong ki.
U la ong ba kane ka jingthmu ka ithuh ïa ka bynta jong ki kmie bad ki kynthei ha ka imlang sahlang katba ka ai lad ban ïoh ïa ka jingshngaiñ kaba kham khraw ha ka liang ka pisa tyngka bad ka jinglah ban pyndap pynbiang ïalade.
U la pynthikna ba ka tnad kan dang bteng ban kyrshan ïa ki prokram kiba thmu ban pynkhlaiñ ïa ki kynthei, ki longïing bad ki shnong ki thaw.
Ha kane ka prokram la don ruh ka jingai khublei ïa u Pem Tshering Sherpa, u khun jong u Chettar Sherpa ba la khlad noh bad ka ïing ka sem jong u kaba don 16 ngut ki dkhot na Lashithang Ward jong ka Rhenock konstitwensi na ka bynta ka jingnoh synñiang jong ki sha ka jingdon jingem jong ka jingbun briew bad ka jinglong longïing longsem ha ka jylla.
Ka nongïoh jingmyntoi ka Sabitri Biswakarma ka la kren ruh halor ki jingeh ba ki kynthei ki ïakynduh bad pynpaw ka jingsngewnguh ïa ki jingïarap ba la ai lyngba ki buit bapher bapher jong ka sorkar.
Ha kane ka prokram la pynlong ïa ka jaka ai jingkoit jingkhiah da ka Jan Kalyan Prakosta bad ka Rhenock Community Health Centre ha kane ka prokram, ha kaba la ai jingïarap ha ka liang ka koit ka khiah bad ki jingshakri ba kongsan ha ka koit ka khiah sha ki nongïoh jingmyntoi bad ki nongleit sha kane ka prokram.
Ha kane ka jingïalang la ïadon lang u Advisor sha u Myntri Rangbah u Bishnu Kumar Khatiwada, Zilla Adhakshya Laden Lhamu Bhutia, Zilla Upadhyaksha Prabha Pradhan, Administration Reforms Commission Chairman SD Dhakal, Commissioner-cum-Secretary Jigmee Dorjee Bhutia, Social Welfare Department Secretary Sarika Rai, Pakyong Deputy Commissioner Pari Bishnoi, Pakyong Superintendent of Police Tshering Sherpa, ki heh ba bun na ki katto katne ki tnat bad ki dkhot jong ki briew sorkar.
Shwa ïa kane, u Myntri Rangbah ka jylla u la ïoh ïa ka khusnam Guard of Honor na ki pulit jong ka District, Pakyong.
