Shillong, Risaw 05
U Bah Prestone Tynsong uba dei u Symbud Myntri Rangbah ka Jylla bad ruh u President ka NPP ha ka Jylla ha ka sngi Nyngkong u la kyntait ïa ki khubor ba ïadei bad ka jingdon jingpynbeit ban pynrung Myntri ïa ki MLA ba rung thymmai sha ka BJP, da kaba pynskhem ba ka kynhun ïatreilang jong ka MDA ka long kaba skhem.
Haba kynthoh ïa ki jingmih ha ki lad pathai khubor, u Bah Prestone u la buh jingkylli ïa ka tynrai jong ka jingïoh lum jingtip.
“Nga la ïohi ha ki kot khubor jong phi, hynrei ngam tip na kano ka jaka phi ïoh ïa ki tyllong khubor. Nga kwah ban kylli na phi baroh kiba la pynmih ïa kata ka jingkren – nangno phi ïoh ïa ka? Kumba ka long ha ka NPP, kam shym la don kum kata ka kyndon ba la buh, la ka long na ka liang ki heh nongïalam ka BJP ne ki heh nongïalam ka NPP,” u la ong.
U la ong ba kam don kano-kano ka jingeh ha ka kynhun synrop bad ba ka Sorkar ym tang ba ka pyndep ïa ka samoi treikam jong ka hynrei kan bteng hadien jong ka.
“Em, ngim don jingeh eiei. Ka Sorkar MDA kan ïai bteng ban ïaid shakhmat, kan pyndep pura bad ngin ïai bteng ruh ynda la kut ka samoi,” u la ong.
Halor ka jingkylli hato ka BJP ka la pyrshang ban pynpait ïa ka NPP, u Bah Prestone u la kyntait jur ïa kane. “Kam don satia kum kata ka jingpyrshang”, u la ong.
