Shillong, Risaw 05
Ka jingthylli da ki hajar tylli ki jaka shong jong ki paidbah nongpeitkai ha ka jingwan ïalehkai ka Brazil ka la pynlong ïa ki bor pynïaid ba kin pynhiar noh ïa ka dor jong ki tiket sha ka T. 199 bad kane ka long hadien shi sngi ka jingïalehkai paralok kaba la long ha Kolkata.
Ka All India Football Federation (AIFF) ka la hap ban shim ïa katei ka rai ban pynduna noh ïa ka dor jong ki tiket ha ka jingïalehkai phutbol paralok ha Vivekananda Yuba Bharati Krirangan (Salt Lake Stadium) hashwa ba ka India kan pynkhreh sa kawei pat ka jingïalehkai pyrshah ïa ka kynhun kaba la bat teng ar sien ïa ka nam lahduh ha ka World Cup, ka Uruguay ka ban long ha ka sngi Ba-ar. Ka dor jong ki tiket na ka bynta ka C2 Left bad ka C2 Right, kaba shongdor T. 1,999 haduh ka step jong ka sngi U Blei, mynta ka la hiar sha ka T. 199, kaba long ka jinghiar da 90%.
Kane ka la wan hadien ba ka jingïalehkai paralok ka India bad ka Brazil ka la hiar sha ka 51,402 ka jingdon ki paidbah nongpeitkai ha ka 3 tarik u Risaw. Kat kum ka jingkheiñ jong ka jingngiam katei ka stadium ka long haduh 85,000, te kumta ki jaka shong kiba da ki hajar tylli ki la thylli watla ka Brazil ka la wanrah ïa ki khlur ïalehkai kum u Vinicius Jr., Gabriel Magalhaes bad u Marquinhos.
Ïa kane ka jingpynhiar dor jong ka bai tiket la pynbna da ka AIFF lyngba ki rynsan social media jong ka ha ka sngi U Blei, ha kaba ka dor ba la pynkylla kan treikam ha ki block ba la jied na ka bynta ka jingïalehkai paralok bad ka Uruguay ha ka sngi Ba-ar. Ka jingpynhiar dor ka mut ba ki nongkyrshan mynta ki lah ban peit ïa ka kynhun kaba na South America ha ka dor kaba bit.
Ka por jong ka jingrai ka long kaba phylla bha. Ka dor jong ki tiket ka la long lypa ka jingïakren ha ka jingpynkhreh ïa ka jingïalehkai jong ka Brazil, ha kaba ka jinglut ka la long kaba heh bad dei na katei ka daw la hap ban kynkiew ïa ka dor jong ki tiket da ka jingkhmih lynti ïa ka jingtuid ki paidbah ki ban sakhi ïa ki khlur ïalehkai ka Brazil.
Ka jingwan ka Brazil ka la long ka jingkhmih lynti kaba khraw namar kane ka kynhun kaba la bat teng san sien ïa ka nam lahduh ka la wanrah ïa ki khlur ïalehkai jong ka kum u Vinicius, Marquinhos bad u Gabriel Magalhaes. Hynrei ka Salt Lake Stadium kam shym la long kaba dap pura watla ka Brazil ka la pynliem ïa ka India da 4-0 kol.
Kat kum ka jingïoh lum jingtip ki paidbah kiba la wan sakhi ïa katei ka jingïalehkai paralok ki long tang 51,402 ngut, kaba mut ba ka dangduna sa palat 33,000 tylli ki jaka shong.
Kumba ka paw kane ka jingïalehkai paralok ka la long kaba lai bad kaba khatduh. Ha ka jingïalehkai kaba nyngkong, ka India ka la lah ban pynïakhaid mar 1-1 kol pyrshah ïa ka Panama hashwa ba kan shah rem ha ka Brazil.
