Shillong, Risaw 05
Ka Khasi Students’ Union (KSU) ka la kynnoh ïa ka Tnad Pulit ba ka pynïaid ïa ki kam dawa pisa ha ka surok National Highway ha Mawkhanu bad Diengpa -soh bad kynnoh ba ki Pulit ki la khrong jubor haduh T.200 haduh T.5000 na kawei pa kawei ka trok kaba kit mar kynthup ki marbam.
Ha ka jingujor sha u Myntri Rangbah ka Jylla u Conrad K Sangma, ka KSU ka la dawa ban weng noh mardor ïa u Superintendent of Police (SP) ka East Khasi Hills u Bah Vivek Syiem bad ban thung ïa ka kynhun jingtohkit kaba laitluid.
Ka KSU ka ong ba u Education Secretary u Samla Alerick Kharjana u la ïalam ïa ka jingkhynra ba sop-sop ha ka 30 tarik Nailur ha ka por 3 baje janmiet bad ïoh ringdur, hapdeng ka shi kynta haduh 30-40 tylli ki trok ki la shah pynsangeh ha katei ka ktem be-aiñ ki pulit ban siew pisa.
“Ka Union tang hapoh ka shikynta ka la lum ïa ki sakhi ‘video’ ba kumba 30-40 tylli ki trok ki la hap sangeh ha kine ki ar jaka harud jong ki khyrdop be-aiñ, ha kaba ki nongbud trok lane ki nongñiah ki hap hiar na kali bad ïaid sha kine ki sem bad siew ïa ka pisa ba T.200 haduh T.500” ong ka KSU ha ka shithi ba 5 tarik Risaw.
Ka Union ka la kam ba ki nongñiah trok ki la phla ha ki nongïalam ka KSU ba ki hap ban siew beit ïa ka pisa lada ym dei kumta ki hap ban mad ïa ka jingshah pyndik ne shah shoh.
Katkum ka jingong ka KSU, ha ka shisngi haduh 500 haduh 800 tylli ki trok ki ïaid lyngba katei ka surok bad kynnoh ba ka jinglum pisa be-aiñ ki pulit ka lah ban kot sha ka T.1 lak haduh T.2 lak ha ka shisngi, kaba la ktah ïa ki paidbah namar ka jingkiewdor ki mar ki mata.
Ka KSU ka kynnoh ba haba ki dkhot ki leit ban kylli tohkit, ki Pulit ha Mawkhanu ki la phet ha ryngkat ka pla ba thep pisa, katba kiba don ha Thangshalai ki la buhrieh ïa ka pisa. Kine ki pulit ki la kynnoh ba ki la leh ïa kane ka kam halor ka jingbthah jong u Officer Incharge ka Mawryngkneng Police Station bad In-Charge ka Diengpasoh Outpost.
“Kane ka jingkhynra ba kyrpang ka pyni shai ïa ka rukom treikam ba bamsap ka Jylla khamtam ha East Khasi Hills kaba hap hapoh ka jingpeit jingkhmih jong u SP Vivek Syiem” la kynnoh ka KSU.
Ka KSU ka la kdew ïa ka durkhih (video) ba la saphriang paidbah ha ka 18 tarik Jylliew, 2026, kaba pyni ïa ka jingkhrong pisa be-aiñ, hynrei ka ong ba ym shym la leh eiei halor kane. “Kumta, u SP Vivek Syiem bad ki bor District kim lah ban ong ba kim don jingtip ïa kum kine ki kam be-aiñ, lada um tip ka mut ba um pat biang bad um pat ïahap ba un long u SP bad lada u tip bad u jied ban ym leh eiei, kane ka pyni ba u don bynta lang ha kane ka jingkhrong pisa be-aiñ” ong ka shithi.
Ka KSU ka la kynnoh ruh ba hadien ka 30 tarik Nailur, ki Pulit ki la leit pynpra ïa kine ki sem ba shipor halor ka jingbthah u SP ban pynjulor ïa ki sakhi, katba tang ki Constable ki la shah sospon bad u OC u la shah pynkynriah kam. “Ha ka jaka ban kem ïa ki Pulit ba bamsap, u jied ban leh eiei da ka lynti kaba jem tang ban ïada ïalade bad pynthame ïa ki paidbah tang ban pynlong ïa ki Pulit Constable kum ki langknia” ka la ong.
Ka KSU ka la kam ruh ba ka sem ha Thangshalai kam don satia ïa ka NOC na ka Dorbar Shnong, ïa kaba la pynthikna ruh da u Secretary Bah Youstar Kharumnuid ha ka 3 tarik Risaw ha ka kot khubor u Nongsaiñ Hima.
Haba pyndonkam ïa ka nongrim jong ki Pulit haba kem ïa u President, Vice President bad General Secretary hadien ka rally thuk-thuk ba 19 tarik Nailar, ka KSU ka ong “Ki nongïalam kim lah ban pynjngai ïalade na kaei kaba jia hapoh ka jingïalam jong ka seng. Kumta haba pynshong nongrim ïa ka nongrim ki Pulit u SP Vivek Syiem ruh u dei ban shah kem bad shah pynshitom, namar um lah ban pynjngai ïalade na kaei kaba jia hapoh ka tnad Pulit kaba hap ha ka jingpeit jingkhmih jong u”
Ka KSU ka la kyntu ïa u Myntri Rangbah ban weng noh ïa u SP bad ïa u Deputy Commissioner ka East Khasi Hills bad hukum ruh ban pynlong ïa ka jingtohkit da ka tnad bad ban thung ïa ka kynhun tohkit kaba laitluid. “U nongtuh um lah ban tohkit ïa u nongtuh” ong ka KSU haba kyntait ban ujor ejahar ha Police Station bad kyntu ïa ka Sorkar ba kan shim ïa kane ka shithi kum ka jingujor ka KSU.
