Shillong, Risaw 05
Ka Sorkar Jylla ha ka sngi Nyngkong ka la shim ba ka jingkhynra jong ka KSU kaba la pynpaw pyrthei ïa ka jingkynnoh khrong pisa beaiñ da ki pulit ka long ka sienjam kaba pdiang sngewbha bad ong ba ïa ki pulit langrut kiba donkti la dep ban sospon.
Haba kren bad ki nongthoh khubor, u Symbud Myntri Rangbah ba khmih ïa ka tnad Kam Pohïing Bah Prestone Tynsong u la ong ba ïa ka jingbthah ban shimkhia la pynmih mar mar hadien ba ka durkhih (video) jong ka jingkyndang ka la paw ha ki rynsan social media.
“Ngi la ïoh jingtip ha katei hi ka sngi ba ki dkhot ka KSU ki la leit sha katei ka jaka. Nga ruh nga la ïohi ha ki social media. Mar kumta hi, nga la bthah ïa ka DGP ba dei ban shimkhia bad leh eiei mardor, bad ka DGP kumjuh ruh u SP ki la leh ïa ka kam,” la ong u Bah Prestone.
U la ong ba ka Sorkar ka pynshlur ban pyntip ïa kum kine ki jingleh bymman.
“Lada don mano-mano ba pyntip ïa ngi shaphang ki kam sniew ba la leh da kano-kano ka tnad Sorkar, ngi pdiang sngewbha. Yn shim ïa ki lad kiba tyngeh pyrshah ïa ki nongtrei ne ki ophisar kiba donkti lane ki pulit,” u la ong.
Haba kyntait ïa ka jingdawa ka KSU ban weng noh ïa u SP, u Bah Prestone u la ong ba ym lah ban pynkitkhlieh ha u SP ïa ki kam ba marwei jong ki pulit kiba don ha ki kyrdan kiba rit.
“Yn pynkynriah na ka bynta aiu? Kam dei ba u SP u la pynbeit ne bthah ban khrong pisa. Lehse don ki case ba kyrpang kiba jia kumne. Ka long kaba biang eh ba la rah sha ki bor ba kham halor bad la leh katkum kata – la sospon,” u la ong.
