Imphal, Risaw:
Ki la don lai ngut ki briew kiba la shahkem bad la kurup 318 tylli ki bilor dawai jyrhoh kiba dei jong ka Codeine ha ka por ba la don ka jingkhynra pyrshah ïa u drok ba la pynlong da ki pulit jong ka Imphal East District bad ki bor pahara ha Imphal East ha ka 4 tarik, Risaw, la ïathuh ki pulit.
Khlem da pynslem hadien ba la ïoh ïa ka jingtip kaba tikna, ka kynhun ba ïatreilang ka la pynlong ïa ka jingkhynra ha ka thaiñ Ningthem Pukhri Mapal, ha kaba u John Longjam ba la tip ruh da ka kyrteng kum u Mani, 41 snem ka rta, uba dei u khun jong u L. Herojit Meitei jong ka Sagolband Tera Khuraijam Leirak, u la shahkem halor ka jinglap ba u la rah ïa ki 158 tylli ki bilor dawai Coup ba la pynmih da ka CHOCO+, kaba don 10 mg ka Codeine Phosphate.
Ha ka jingtohkit, la kynnoh ba u Longjam u la pynpaw ïa ki jingtip kiba la ïalam ïa ka kynhun pahara sha uwei pat u briew uba la shah suba, u Longjam Wanglen, 41 snem ka rta, u khun jong u L. Noren jong ka Naoremthong Khulem Leikai. Une u la shahkem na ka jaka sah jong u.
Da kaba pynshong nongrim halor ka jingpynpaw jong u Wanglen, ka kynhun ba ïatreilang ka la ïoh ban kem sa uwei pat u briew uba la tip kyrteng kum u Ningthoujam Henching 29 snem ka rta uba dei u khun jong u N. Chaoba na Singjamei Oinam Thingel.
Ki pulit ki la ïathuh ba 160 tylli ki bilor dawai Coup ba la pynmih da ka CHOCO+, kaba don 10 mg ka Codeine Phosphate, la lap bad kurup noh na u Henching.
Haba kyllum lang, kane ka jingkhynra ka la pynlong ïa ka jingkurup haduh 318 tylli ki bilor dawai jyrhoh, ha ryngkat kawei ka kali Mahindra XUV bad kawei ka scooter TVS Jupiter.
Ïa ki lai ngut kiba la shah kem ryngkat bad ki tiar kiba la ïoh kurup la aiti noh sha ki pulit ka Porompat Police Station ban leh ïa kaba donkam katkum ka aiñ, la ïathuh ki pulit.
