Shillong, Risaw 05
Lai ngut ki samla ïalehkai ka Jylla ki la shah jied ban mihkhmat ïa ka kynhun ïalehkai ka ri India sha ka 6th Junior & 21st Senior World Pencak Silat Championship 2026 ka ban long ha Tashkent, Uzbekistan naduh 5 haduh 12 tarik u Nohprah mynta u snem.
Kine ki long ka Rimchi Sangma ka ban shim bynta ha ka Tunggal, katba u Philip Khymdeit bad u Tobias Klein, ki ban shim bynta ha ka Ganda.
Kat kum ka jingpynpaw da u President ka Meghalaya Pencak Silat Association (MPSA) u Bah D. Ryntathiang u la pynpaw ïa kine ki khynnah la pynbna da ka Indian Pencak Silat Federation hadien ba ki la lah ban pynpaw ïa ka jingtbit ha ka lympung ïalehkai National Level kaba la long dangshen ha kane ka nongbah. “Ha ka jingshisha ki don saw ngut kiba la shah jied ban mihkhmat na ka jylla Meghalaya, hynrei ka Banrilang Muktieh ka la duh ban leit shim bynta na ka daw ka jingbym shah na ïing. Te kumta ngin hap ban phah tang 3 ngut ki khynnah ki ban mihkhmat ïa ka ri India sha katei ka lympung.”
Ïa mynta kitei ki khynnah kin hap ban pynbiang ïa baroh ki jingdonkam kum ki passport bad kiwei kiwei khnang ba kin lah ban leit shim bynta sha katei ka lympung.
Ïa katei ka lympung yn pynlong da ka Uzbekistan Pencak Silat Federation hapoh ka jingkhmih da ka Pencak Silat Federation of Asia (PFA) bad ka International Pencak Silat Federation (PERSILAT).
