Shillong, Risaw 05
Phra ngut ki nong-ïalehkai Kettlebell ka Jylla hapoh ka lama jong ka Meghalaya Kettlebell Associa-tion (MKA) ki la shah jied ban mih-khmat ïa ka ri India sha ka WKSF Open Asia & Oceania Kettlebell Cham-pionship 2026 ka ban long ha Panjim, Goa naduh 23 haduh 25 tarik mynta u bnai.
Kine ki long u Principal ka skul Kiddies Corner Bah Brian Wallang (Veteran/Senior), kumjuh ha ka kyrdan Senior ki long u Sandeep Sharma, Sonia Langstieh, Kathie Decruse, Enifer Rowena Nongkynrih. Ha ka liang ki Junior ki long ka Boonyapon Butsrisouy, Raikom Timung bad ka Ïaphilaihun Talang. Dangshen u Raikom Timung bad ka Ïaphilaihun ki la ïohpdiang ïa ka nam Best Junior Lifter ha ka State Championship 2026.
Lah ban kdew ba kane ka lympung ïalehkai bar ri ka long ka jingplie lad na ka bynta ki nongïalehkai ba kin ïoh ban pyni ïa ki sap ba kyrpang ha kane ka jait jingïalehkai bad kiwei pat ki nongïalehkai jong ki ri ka pyrthei.
Ïa katei ka lympung yn pynlong da ka GSIF India ha ryngkat ka Goa Kettlebell Association. Kane ka long ka sien kaba lai ba ka India ka la pynlong ïa kane ka lympung ïalehkai bar ri, hadien ba la pynlong teng ha Mumbai bad Pune.
