Itanagar, Risaw:
Ka jingsahteng halor ka jingthmu ban pyntreikam ïa ka projek Siang Upper Multipurpose kaba 11,000 MW ha Arunachal Pradesh ka la bteng ha ka sngi U Blei, 4 tarik u Risaw ha kaba u Myntri ka jylla u Ojing Tasing u la pynskhem ba ka sorkar jylla kam lah ban ïapynbeit halor ki mat kiba ïadei bad ka jingshngaiñ ka ri bad kam ba palat 80 percent ki briew ki kyrshan ïa ka jingpyntreikam ïa ka projek ha ki shnong ki thaw.
U Tasing, uba mihkhmat ïa ka Pangin Assembly konstitwensi ha Siang distrik, u la ong ba katei ka projek ba la tyrwa ka long kaba kongsan ym tang na ka bynta ka jingpynmih bording hynrei wat na ka bynta ka jingpahara ïa ki khappud bad ka jingpynjem ïa ka jingshlei um, khamtam eh ha ka liang jong ki jingtei ba dang pynroi da ka China sha ki bynta ba sharum jong ka wah.
“Ka jingshngaiñ ka ri ka dei ka phang pdeng, bad ka sorkar jylla kam don ktien ei ei ha kum kine ki mat. Ka jylla kam lah ban ïapynbeit ha ki mat kiba ïadei bad ka jingshngaiñ ka ri,” la ong u Tasing.
U Myntri u la kyrpad ïa ki nongshong shnong ba kim dei ban khanglad ïa ki kam pynroi ba la kyrshan da ka sorkar bad u la ong ba ka jingsuk bad ka jingpynneh ïa ka suk ka saiñ ka long kaba donkam bha na ka bynta ka roi ka par jong ka thaiñ.
Ka thaiñ Siang, kaba bun ki shong ki sah da ki trai ri trai muluk Adi, ka la sakhi ïa ka jingpyrshah kaba bteng ïa katei ka jingthmu, kaba la thmu ban pyntreikam da ka NHPC Limited.
Katto katne ki seng trai ri trai muluk ki la pynpaw ïa ka jingsngewkhia halor ka jingktah kaba lah ban mih na ka ïa ka mariang bad ka imlang sahlang.
Ka Siang Indigenous Farmers’ Forum (SIFF) bad kiwei kiwei ki kynhun pyrshah ki la kdew ïa ka jingsngewkhia halor ka jingpynthut ïa ka mariang, ki jingma na ka jingtwa khyndew bad ka jingma kaba lah ban pynkynriah ïa palat 25 tylli ki shnong ba shong ba sah ki briew, nalor ka jingduh noh ïa ki jaka rep ha ka them Siang.
U Deputy Commissioner ka Siang u Tayi Taggu u la kyrpad ruh ïa ki nongshong shnong ba kin ïatreilang bad ka sorkar halor ki kam pynroi katba dang wad ban weng ïa ki jingeh halor ka jingktah jong kane ka projek ïa ki jaka shong jaka sah ha ka distrik.
U Taggu u la ong ba kane ka projek la khmih lynti ba kan don ka jingktah kaba rit eh ha ka liang ka jaka shong jaka sah ha ka shnong ha Siang distrik, wat la ki don ki jaka, kynthup ïa ka Geku bad ka Yingkiong ha Upper Siang distrik, kiba lah ban shah ktah.
Katkum ka jingong jong u Deputy Commissioner, ki jingtei kiba lah ban shah ktah ha ki jaka kum ka Parong bad Sitang ki long kumba 10 haduh 15 percent.
U la ong ba kiba bun na kine ki dei ki jaka khaïi ne ki jaka ïadei ïathied ba shipor haba ïanujor bad ki ïingsah jong ki kpa tymmen.
U Taggu u la ong ruh ba ka jingpyrshah ïa katei ka projek kam shym la mihkhmat ïa ka jingbun paid kaba kham heh ha ka thaiñ.
U la kam ba palat 90 percent ki nongshong shnong ha ki shnong ba kynthup ïa ka Parong, Riga, Riew, Pangkang (Kumku), Jorkong bad Sitang ki kyrshan ïa kane ka projek, bad ba la dep ban ïasoi ïa ki soskular jong ki kynhun pyrshah na ka bynta ki kam kiba la dei ban pyndep hashwa.
U Deputy Commissioner u la ong ba ki jingkynnoh ba ki paidbah ki pyrshah jur ïa katei ka projek kim pyni ïa ka jinglong jingman ha ka jaka.
Ka projek ba la tyrwa ka la dang long ka mat kaba don jingïakynad ha Siang hapdeng ki jingsngewkhia kiba ïakhun pyrshah halor ka roi ka par, ki jingma ïa ka mariang, ka jaka bad ka jingmyntoi jong ka imlang sahlang, bad kumjuh ruh ki jingpyrkhat ba kongsan kiba ïadei bad ka jingjan jong ka thaiñ sha u pud u sam jong ka pyrthei.
Kane ka jingshim jong ka sorkar jylla ka wan hadien katto katne sngi ba u Myntri Rangbah ka jylla u Pema Khandu u la ong ha ka 29 tarik, Nailur ba ïa kane ka projek yn ym rah shakhmat lada ki riew shemphang kin rai ba ka long ka bym lah ban treikam ha ka liang ka jingstad hadien ba la pyndep ïa ka Preliminary Feasibility Report.
Ïa kane ka Siang Upper Multipurpose Project ba la tyrwa la pyrkhat kum ka projek ba heh jong ka bor ding um bad ka projek pyntreikam ba bun rukom ha Arunachal Pradesh.
Ka lawei jong ka ka dang sah hapoh ki jingpeit bniah ba stad hapdeng ka jingpyrshah kaba bteng na ki bynta jong ki nongshong shnong bad ki kynhun trai ri trai muluk.
