Islamabad, Risaw:
Ka Turkey bad ka Pakistan kin shim ïa ka rai halor ka jingphah shipai kyrkieh sha Saudi Arabia kum shi bynta jong ka jingïateh lok ba thymmai ban ïada markylliang, la ong ki lai tylli ki ri ha ka Sngi Nyngkong, katba ka Gulf ka dang mad ïa ki jingshah thombor kiba nang jur na ki Houthi jong ka Yemen.
Ki lai tylli ki ri ha u Nailar ki la iasoi ïa ka jingiateh kular ban ïada ïa ka Mecca kaba kular ïa ki ban wan iarap iwei ïa iwei haba uwei na ki, u shah thombor.
Kane ka jingïateh kular ka pynïatylli ïa ka kynhun shipai kaba ar jong ka NATO, kata ka jong ka Turkey bad ka Pakistan, kaba dei tang ma ka marwei ka ri kaba don ïa ki tiar nuclear ha ka pyrthei Islam, bad ka Saudi Arabia, kaba long ruh tang ma ka marwei ka ri kaba don ïa ki tiar ialeh nuclear ha Gulf.
Ki nongmihkhmat jong ki, ki la pynlong ïa ka jingïalang kyrkieh ha Riyadh ha ka sngi Nyngkong ha kaba ki la kdew ïa ki jinghiar thma ba dang shen ïa ka Saudi Arabia, khamtam kito kiba la thmu ïa ki nongbah ba kyntang jong ka Mecca bad Medina, khlem da jer kyrteng ïa ki Houthi ba la kyrshan da ka Iran.
Ki lai ngut “ki la pynskhem biang ïa ka jingkyntait ba khlem jingartatien jong ki ïa kano kano ka jingshah thombor ne jingbyrngem pyrshah ïa ka jingshngaiñ bad ka jinglong trai jong ka Hima”, ki la ong ha ka jingpynbna ba ïatreilang.
Ki la mynjur ruh “ban iaid mardor sha ka jingpyntreikam kaba shisha ïa ki jingkular ban iada lang bad ban shim ïa ki lad ki lynti kiba donkam ban pynbiang ïa ki bor shipai bad ki jinglah ba la mynjur bad ban pynthikna ïa ka jingpyntreikam stet jong ki ha ka Hima”.
Ka kyrwoh kam shym la batai bniah ïa ka jait kam kaba ki shipai kin pyndep shisien ba ki la poi ha Saudi Arabia.
Ka hima ka la mad ïa ki jingshah thombor ba man ka por jong ki Houthi kiba la thmu ïa ki nongbah jong ka, ki jaka shna umphniang bad ki lieng naduh ba ka thma pohïing ha Yemen ka la bthei biang ha u bnai Jylliew.
Ha u bnai Naiwieng, katei ka kynhun ka la sdang ïa ka jinghiar thma kaba thymmai kaba la kurup ïa ki jaka ba heh na ka sorkar Yemen kaba la kyrshan da ka Saudi, kaba ha ka sngi Nyngkong ka la sdang ïa ka jinghiar thma pyrshah da ka jingkyrshan jong ka Riyadh ban wad ban shim biang ïa baroh ki jaka jong ki Houthi, katto katne na ki la bat la palat shisnem.
