Shillong, Risaw 05
U Myntri ka tnad ïalehkai ka Sorkar Jylla u Bah Wailadmiki Shylla ha ka lah sngi U Blei u la ong ba ka jingleit jong u dangshen sha Japan ka long ban ïoh jingithuh na ka bynta ban pynlong ïa ka National Games 2027 ha Meghalaya.
Haba kyntait ïa ki jingkynthoh ba ka Meghalaya kam don nongïalehkai ki ban mihkhmat ïa ka ri India ha Asian Games, u Bah Shylla u la ong, “Ka long kaba bakla namar ngi don ïa u nongïalehkai uba matlah (para-athlete) u ban mihkhmat ha ka Asian Para Games. Hynrei ka jingleit kam shym la long shaphang la ngi don ne em ki nongïalehkai, ka jingleit ka long tang na ka bynta ban pynpaw pyrthei namar ha u snem ban wan ngin pynlong ïa ka National Games, kaba long ka lympung kaba heh duh ha ka ri.”
U la ong ba ka Asian Games bad ka National Games ki long syriem kumjuh. “Lada ïanujor ïa ka Asian Games bad ka National Games, kam ïapher than ha kaba ïadei bad ka jingdon ki nongïalehkai, lehse ka jingïapher ka long 2000 bad 3000,” u la bynrap.
U Bah Shylla u la ong ba kane ka jingleit ka long ban sngewthuh ïa ka rukom pynïaid ïa ki jingïalehkai kiba heh. “Dei na kata ka daw ba ngi la pyrkhat ba kane ka dei ka kabu kaba biang eh na ka bynta jong ngi ban leit ban ïoh jinghikai na ki, ban peit kumno ka jingpynkhreh ka ïaid. Ngi kwah ban ïohi ïa ki jingtei, ki jingpynbeit bad baroh ki jingdonkam,” u la pynpaw.
Shuh shuh utei u Myntri u la ong ba kane ka kynhun ka kynthup ïa ki heh ba kongsan jong ka jingïalehkai.
“Dei na kata ka daw ba ngi la pyrkhat ba kane ka dei ka kabu kaba paka ha kaba nga la shim ym tang ïa ki ophisar na ka tnad ïalehkai, hynrei wat ïa u President bad Secretary jong ka Meghalaya State Olympic Association, u Director, Joint Director, bad ka kynhun technical ban peit kumno ngi lah ban leh kham bha shisha hangne ha Meghalaya,” u la bynrap.
