Kohima, Risaw:
Ki pulit ka Kohima ki la ïoh ban kurup haduh 20 hajar tylli ki dawai Yaba (methamphetamine) kiba shong dor kumba 1.6 klur tyngka bad la kem ruh ïa arngut ki briew kiba donkti ha ka kam khaïi drok.
Kine kiba la shah kynnoh ki dei kiba la tip kyrteng kum u Nazrul Islam (36) bad u Deben Kumar Das (40), baroh arngut ki dei ki nongshong shnong jong ka Silchar distrik, ha Assam.
Katkum ka kyrwoh ba la pyllait da u PRO jong ki pulit ka Kohima ha ka lah sngi U Blei, la ïathuh ba ïa kane ka jingïoh kurup la leh ha ka por ba ju pynlong ïa ka jingkhynra ïa ki kali bad ka jingpahara man ka por ha ka lad Kidima Prayer Park kaba don ha Kohima.
Ki pulit ki la bat ïa kawei ka kali Hyundai Venue kaba don ïa u nombar AS01EB0630 hadien ba ki la ïohi ïa ka jingsuba ba la pynkylla dur ïa katei ka kali.
Kawei ka bynta jong ka mala jong ka ka la paw ba dang shen la bteng bad la ai rong thymmai, kaba la pynmih ïa ka jingsuba hapdeng ki shipai.
Ka jingwad hadien la ïathuh ba la lap katto katne ki song ba rit ba la sop da ka plastik kaba lieh ba la buhrieh hapoh ki thliew hapoh ka bynta ba la pyndait thymmai jong ka kali.
Ki pulit ki la ïathuh ba na ka jingwad bniah ka la lap ïa ki 10 tylli ki song kiba pdeng ka jingheh kiba don 20 hajar tylli ki dawai kuli Yaba. Kine ki drok ki don ka dor khaïi kaba la antad kumba 1.6 klur tyngka.
Ïa ki arngut kiba shong ha katei ka kali la bat ha katei ka jaka bad la rah ïa ki sha patok.
Ha ka jingtohkit ba nyngkong, la kynnoh ba kitei kiba shah kynnoh ki la ïathuh ha ki pulit ba ki la ïoh ïa utei u drok na Churachandpur ha Manipur bad ki leit sha Silchar ha Assam.
Ka la don ka jingujor mukotduma katkum ki kyndon ba ïadei jong ka Narcotic Drugs and Psychotropic Substances (NDPS) Act ha ka jaka treikam jong ki pulit ka Kezocha bad ka jingtohkit ha kaba ïadei bad kane ka dang ïai bteng.
