Shillong, Risaw 06
Ka Meghalaya Amateur Kabaddi Association (MAKA) ka la pynlong ïa ka prokram jied khynnah bad ka jingai jinghikai (Selection Trial & Training Camp) ha ka sngi Ba-ar ha Multipurpose Indoor Stadium jong ka Border Security Force (BSF) kaba ha Umpling, Shillong.
Ïa kane ka prokram la plie da u DIG (PSO) Frontier jong ka BSF u Manoj Kumar Sharma ha kaba la ïadon lang ki heh katei ka kynhun shipai khappud, kumjuh ki nong-ïalam ka MAKA kynthup ïa u President Bah Hima-laya M. Shangpliang, General Secretary Bah Manbhalang Kharkamni, ki khynnah ïalehkai kynthei bad shynrang bad kiwei kiwei.
Ka jingpynlong ïa kane ka prokram ai jinghikai kaba san sngi ka long shi bynta ban sei ïa ki kynhun ïalehkai shynrang bad kynthei (Under-20) ki ban leit shim bynta ha ka 52nd Junior National Kabaddi Championship 2026 ka ban long ha u Naiwieng mynta u snem ha Bihar bad Punjab.
Kumba ka paw ka Kabaddi ka long ka jingïalehkai kaba paw hapoh ka ri India, hynrei ka danglong kaba dangthymmai hapoh ka Jylla ha kaba la seng ïa ka dangshen mynta u snem bad ka jingthmu ha lyndet jong kane ka long ban sei ïa ki kynhun ïalehkai ki ban shim bynta ha ka 39th National Games ka ban long ha u snem ban wan ha kane ka Jylla.
“Kane ka jingïalehkai ka long kaba la rim bha hapoh ri India, hynrei ngi donkam ban pynim ïa kane ka jingïalehkai hapoh ka Jylla jong ngi namar ki khynnah jong ki long kiba tbit bha ha kane ka jingïalehkai,” la pynpaw u Bah Himalaya haba ïakren bad u nongthoh khubor.
“Hadien ba la seng ïa ka synjuk ïalehkai Kabad-di, ngi la pyrshang ban wad ïa ki khynnah kiba nang ha kane ka jingïa-lehkai bad kaba sngewtynnad ka long ba ngi la shem ba ki don bun bah kiba nang ïa kane ka jait jingïalehkai namar ki don kiba leit pule ha ki skul Jawahar Navodaya Vidya-laya (JNV). Te ngi la wanrah ïa ki coach kiba nabar ki ban ai jinghikai ïa ki khynnah namar ngi la shah khot ban leit shim bynta ha ka Junior National Kabaddi Cham-pionship ka ban long Bihar bad Punjab,” u la bynrap.
Ha kaba ïadei bad kane ka prokram ai jinghikai, ka MAKA ka la wanrah ïa ki coach kiba na Uttar Pradesh kata u Arjun Tevathiya bad u Dushyant Sanjay Berwal khnang ba kin long ba la khreh ban shim bynta ha Bihar bad Punjab, ryngkat ka jingpynkhreh ïa ka National Games 2027.
Haba phai sha ka jingkren jong ka jingïalang plie, u Manoj Kumar Sharma u la pynpaw ba watla kane ka danglong tang ka jingsdang, hynrei kum ki khynnah ki dei ban pynleit jingmut bha ha kane ka jingïalehkai haba ki shong ne ki thiah ne hangno hangno ba ki don. Lyngba ka jingdon lang ki coach ki ban ai jinghikai ïa ki, nga kyrmen skhem ba kin sa lah ban pynpaw ïa ki sap ïalehkai jong ki.”
