Shillong, Risaw 06
Ka Nangkiew Irat bad ka Meghalaya Police ki la ïasam mar shi poiñ ha ka lympung ïalehkai Shillong Premier League 2026, hadien ba ki la ïakhaid mar 2-2 kol ha ka sngi Ba-ar ha SSA Stadium, Polo.
Ïa ki lai kol la thep ha ka kylla step, ha kaba u Everestarly Rynjah (12′) bad u Rapborlang Marwein (21′) ki la ïoh ban thep kol na ka bynta ka MLP bad u Yhoto Lohe (13′) u la thep na ka bynta ka Nangkiew Irat. Kane ka kynhun ka la lah ban pynïakhaid ha ka kylla miet lyngba u Neblejohn Lyngdoh (85′).
Lyngba kane ka jingïakhun kaba khatduh, ka Nangkiew Irat kam pat thikna ban lait na ka jingma jong ka jingshah pynhiar kyrdan, namar ka danghap ban ap na ka jingmih jong ka jingïakhun ba khatduh jong ka MLP bad ka Laitkor ka ban long ha ka 9 tarik.
Te kumta ka Nangkiew Irat ka la don ha ka kyrdan baphra ha kaba ka la ïaryngkat mar 9 poiñ bad ka Sawmer, hynrei kan ym ïoh rung sha ka SSA Super Cup, namar tang ki kynhun kiba don ha ka thup ba hynriew (Top 6) ki ban ïoh shim bynta. Katba ka MLP ka la kiew sha ka kyrdan basan bad kamai 11 poiñ.
Ha kawei pat ka liang, ka Mawlai SC ka la long la khreh ban rah ïa ka nam lahduh mynta ka aïom, ha kane ka kynhun kan ïakhun pyrshah ïa ka Rangdajied United FC ha ka sngi Balang ha ka por 3 baje nohphai sngi.
Kumba ka long mynta ka Mawlai (18 poiñ) ka danglong ka kynhun kaba danglamkhmat ha kane ka lympung bad kaba la tam da shi poiñ ïa ka Shillong Lajong kaba la wan ba-ar. Lada kane ka kynhun hapoh ka jingïalam u Bah Hering Shangpliang ka lah ban khur ïa ka jingjop, kan rah ïa ka nam lahduh ha ka sien kaba lai naduh ba ka la jop teng ha u snem 2022 bad 2023.
Kane ka aïom ïalehkai mynta mynta u snem ka long syriem kumba long ha u 2025, ha kaba ka Mawlai ka la ïakynduh pyrshah ïa ka Rangdajied United bad ka donkam ban khur jingjop hakhmat ki paidbah nongkyrshah. Hynrei ka la long da khongpong namar ka Rangdajied ka la lah ban ïalehkai bha na ka bynta ban pynïakhaid mar 1-1 kol, ha kaba ka Mawlai ka la hiar sha ka kyrdan balai bad la rah ïa ka nam lahduh da ka Langsning FC.
Kane ka la wan jia ruh ha u snem 2024 ha kaba ka Mawlai kaba la ïoh ban lamkhmat, ka donkam tang shi poiñ pyrshah ïa ka Shillong Lajong. Hynrei ka Mawlai ka la shah rem noh bad ka Lajong ka la rah ïa ka nam lahduh.
Ka Mawlai kaba la shimti da ujuh u coach bad kiba bun ki dei kijuh ki rangïalehkai ha ki ar tylli ki aïom kum u Fairming Suting, Damanbhalang Chyne, Arkibor Makhroh, Samlang Rympei, Kevin Rymbai, Robertson Khongriah bad kiwei. Ym don jingartatien ba kin ym lah ban klet ïa kaei kaba la jia ïa ki. Hynrei kane kan long ka jingai mynsiem ïa ki ba kin ïalehkai bha ha kane ka lympung khnang ba kin lah ban pynurlong ïa ka jingjop.
