Shillong, Risaw 06
Ka India ka la pynkut da ka jingshah rem ha ka Uruguay da 6-1 kol ha ka jingïalehkai paralok kaba khatduh ha ka sngi Ba-ar ha Vivekananda Yuba Bharati Krirangan (Salt Lake Stadium) kaba ha Kolkata.
Kane ka long ka jingshah rem kaba ar na ka bynta ka India ha kane ka jingïalehkai paralok ha la ïing ha kaba dangshen ka la shah pynliem ha ka Brazil da 4-0 kol, hynrei ka la lah ban pynïakhaid mar 1-1 kol pyrshah ïa ka Panama ha ka jingïalehkai kaba nyngkong.
U rangïalehkai ka Jylla u Ricky John Shabong u la shah pynshong ben ha kane ka jingïakhun bad um shym la ïoh ban mih madan haduh kaba kut ka jingïalehkai.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Ka Uruguay ka la pynkhih jar nyngkong lyngba ka penalty ba la shut da u Darwin Gabriel Nunez ha ka minit kaba 11, hynrei ka India ka la lah ban pynïakhaid lyngba u Anirudh Thapa (22).
Ka Uruguay ka la ïoh ban thep biang ïa ka kol kaba ar lyngba u Maximiliano “Maxi” Javier Araujo (28) na ka bynta ban da 2-1 kol ha ka kylla step.
Hadien katto katne por ba la bteng biang ïa ka kylla miet, ka Uruguay ka la ïoh ban thep kol biang lyngba u Rodrigo Zalazar (53) hashwa ba u Araujo u la pynbud biang ïa ka kol kaba ar ka jong u ha ka minit kaba 59.
Watla ka India ka la pyrshang ban ïakhun tyngeh na ka bynta ban pynphai, hynrei ka la shah thep kol biang lyngba u Juan Manuel Sanabria (71′). Hashwa ban wai ka India ka la shah thep biang sa shi kol lyngba u Rodrigo Aguirre (86′) bad ban pynlong ïa ka Uruguay ban khur syndon ïa ka jingjop.
