Shillong, Risaw 06
Ka khlur nongtied ba kynsai jong ka ri, ka Smriti Mandhana ka la shah thung kum ka kapten ba thymmai jong ka kynhun ïalehkai kriket ki kynthei ka India.
Kane ka jingshah thung ka la wan hadien ba ka Harmanpreet Kaur ka la hiar shuki kum ka kapten ka India ha baroh lai tylli ki jingïalehkai.
Kane ka ‘thei ïalehkai na Sangli kan mih madan kan ïalam ïa ka kynhun ha ka sien kaba nyngkong eh kum ka kapten ha ka jingïalehkai T20I series pyrshah ïa ka Zimbabwe. Ka India kan ïakhun pyrshah ïa ka Zimbabwe ha ki lai tylli jingïalehkai T20I bad lai tylli ha ka ODI ha Raipur naduh ka 16 haduh ka 28 tarik mynta u bnai.
Ka Smriti ka la don ka jingshemphang ha ka kam nongïalam. Ka la long ka kapten ka India ha kiba bun ki jingïalehkai ODI bad T20I ha ki por ba la dep bad ka la ïalam ruh ïa ka Royal Challengers Bengaluru ban khur ar tylli ki nam lahduh ha ka Women’s Premier League (WPL).
Ka la long ka nongtied kaba la kamai bun tam ha ki jingïalehkai kriket bar ri bad ka la don ruh ha ka thup kaba hakhlieh napdeng ki nongtied ban kamai bun run ha ki jingïalehkai T20I.
Na ka liang ka Board of Control for Cricket in India (BCCI) ka la pynthikna ïa ka khubor halor ka jingthung ïa ka Smriti, lyngba ka jingpyllait ïa ka khubor ha ka website jong ka.
“Ka Smriti ka la long kawei na ki nongïalehkai ba paw ha ka kriket jong ki kynthei jong ka India ha kine ki snem bad ka la don ka bynta kaba kongsan ha ka jingkiew jong ka kynhun ha baroh ki jingïalehkai, 2026. Kane ka nongïalehkai kriket ba tbit ha ka pyrthei, ka la pyni ruh ïa ka jinglong nongïalam jong ka ha ka kriket hapoh ka ri, kaba dangshen ka la ïalam ïa ka Royal Challengers Bengaluru sha ka nam lahduh jong ka Women’s Premier League ha u snem 2024 bad 2026.”
“Namar ba ka la don bynta ha ka kynhun ïalehkai ka India naduh u snem 2013, ka Smriti ka wanrah ïa ka jingshemphang kaba khraw ha ka kam ïalehkai. Mynta kan shimti ïa ka jingkitkhlieh ban ïalam ïa ka kynhun, ha kaba ka India kan rung sha ka bynta kaba thymmai bad kan bteng ban tei ïa ka jinglah kumba ka la lah ban leh ha kine ki snem ba la dep,” la bynrap ha ka kyrwoh.
