Shillong, Risaw 07
Ka All Meghalaya Primary School Teachers’ Association (AMPSTA) ka la byrngem ban pynjur ïa ki jingïakhih lada ka Sorkar Jylla ka dang ïai-leh kuman ban pynurlong ïa ki mat jingdawa da kaba pynkynmaw ïa ka jingjia ha u snem 1983 bad ban pynlong ka jingïakhih hakhmat Secretariat.
“Lada ka Sorkar Jylla ka dang leh mynthi ban pynurlong ïa ki mat jingdawa, ngim banse ban shim da ka sienjam ban dang pynjur ïa ki jingïa-khih da kaba ngin phai biang ïa ka jingjia ba la jia ha u snem 1983, ha ka por ba ngi dawa ïa ka Sorkar ban shimti ïa ki skul Primary na ki lai tylli ki District Council, ha kaba ka Sorkar ka leh mynthi ha kito ki por bad kaba la pynlong ïa ngi ban khang skul haduh 9 bnai ha Garo Hills” la ong u Babu F.C Shullai General Secretary AMPSTA.
U Babu Shullai u la pynkynmaw ïa kane ka jingjia ha ka jingïalang paidbah ki nonghikai kaba la long ha phyllaw ka Pynthorumkhrah-Golflinks Community Hall hadien ba la dep ka jingïaid rally ba la pynlong da ka AMPSTA ha kaba la wan ban ïashim bynta da ki hajar ngut ki nonghikai ‘Deficit’ ba na Khasi-Jaiñtia bad na Rilum Garo.
U Babu Shullai ula pynpaw ka jingsngewburom ïa ka Sorkar Jylla namar ba ka la sngap kumba 30% na ka 100% ki mat jingdawa ba ki nonghikai ki la ju pynsngew, u la bynrap ba watla ka Sorkar ka la jubab ïa ki jingdawa jong ki, hynrei ka AMPSTA kan ym pat shongkli kti katba ym pat urlong lut baroh 8 tylli ki mat jingdawa.
U Babu Shullai u la ïathuh ba napdeng ki 8 tylli ki mat jingdawa, ka Sorkar ka sngap tang katto katne ki mat jingdawa ha kaba ka la rai ban pynneh pynsah ïa ki Sanction Post jong Government bad Deficit, katba haba ïadei ka jingdawa ban ‘Regularize’ ïa ki nonghikai L.P School kiba rung ha ka kam shuwa u snem 2007, ka Sorkar ka dang pyrkhat ïa kane, “Ka Sorkar ka la pdiang bad ka la ai da ka jingthoh ba kan ym ktah eiei ïa kine ki Post hadien ba la shongthait. Nga sngew ba kane ka dei kawei na ka jingjop” u la ong.
Ha kajuh ka por u la ban jur ïa ka Sorkar ba ka dei ban sngap ïa ka jingdawa ban weng noh ïa ki skul Deficit kiba shah kynthup ha ki Notified School bad dei ban weng ïa ka kyndon ba dei ban don 15 ngut ki khynnah ha kawei ka klas.
Ban shu kdew hangne, ki jingdawa ka AMPSTA ki kynthup ban pynneh pynsah ïa ki Sanction Post jong ki skul Government, Deficit. Ban pyndap mardor ïa ki kam ba sah thylli ha ki skul Sorkar bad Deficit, ka Sorkar ka dei ban Sanction ïa ki Additional Post khamtam ha ki skul kiba don nonghikai tang marwei, ban pyntreikam pura ïa ka Government PRAN, bad ban pyllait ïa ki nonghikai Primary School na ka kam thoh Census ‘B.L.O. Duty’, ban ‘Regularize’ ïa ki nonghikai L.P School kiba rung kam shuwa u snem 2007 bad ban weng noh ïa kawei na kine ki hukum (Order) kata ka long EDN.79/2005/72 kaba dei ha ka 27 tarik Naitung 2026, ha ka bynta 1(a)(i) bad (ii), bad ha ka bynta 5(a) kaba ïadei bad ki Notified Schools.
