Shillong, Risaw 07
Hadien ba ka la pynlehnohei ha ki ar snem ba la lah, ka Mawlai SC ka la lah ban pynurlong na ka bynta ban rah ïa ka nam lahduh ha ka Shillong Premier League 2026, hadien ba ka lah ban pynliem noh ïa ka Rangdajied United da 5-0 kol ha ka sngi Balang ha SSA Stadium, Polo.
Watla ki dangsah sa saw tylli ki jingïalehkai ba dangsah na ka bynta kiwei pat ki kynhun, hynrei kane ka dei ka jingïakhun ba khatduh jong ka Mawlai bad ka la lah ban pynurlong ïa ka jingjop na ka bynta ban kamai 21 poiñ.
Ha kane ka jingïakhun ka Mawlai ka la lah ban thep lai kol ha ka kylla step lyngba u Basuklang Bina (13), Arkini Laloo (16) bad u Fairming Suting (22). Kane ka kynhun hapoh ka jingïalam u Bah Hering Shangpliang (coach) ka la thep biang sa ar kol ha ka kylla miet lyngba u kapten u Damanbhalang Chyne (83) bad u Ricky Chyne (90) bad ban khur ïa ka jingjop hakhmat ki paidbah nongkyrshan jong ka.
Kumba ka paw ka Mawlai ka la long ka kynhun kaba khlem shah rem naduh kaba sdang kane ka lympung ha kaba ka la jop hynriew sien bad ïakhaid lai sien. Haba kheiñ ïa ka jinglah ban thep kol, ka Mawlai ka la thep 17 kol bad shah thep pat tang 2 kol haduh kaba kut ki khyndai sien ïakhun.
Kane ka long ka sien kaba lai ba ka Mawlai ka la ïoh ban rah ïa ka nam lahduh ha ka SPL naduh ba ka la rah teng ïa ka trophy ha u snem 2022 bad 2023. Ha ka jingshisha kane ka kynhun ka la dei ban rah biang ha u snem 2024 bad 2025, hynrei kam shym la lah ban pynurlong na ka daw ka jingkheiñ sting ki rangïalehkai jong ka.
Kumba ka paw ka Rangdajied kaba don ha ka kyrdan ba hynriew, ka la pynshong ïa katto katne katne na ki rangïalehkai (first team) bad ka la pynïakhun da kiba la ju shongben. Hynrei ha ka pynmih katto katne ngut ha ka kylla miet.
Ka jinglah ban ïalehkai bha ki rangïalehkai ka RUFC naduh kaba sdang, ka la pynlong ïa ka Mawlai ban ïakhun tyngeh kat haduh ba ka la lah ban thep lai kol ha ka kylla step. Ïa ka kol ba nyngkong la thep da u Basuk, uba la don lypa ha ‘box’ bad u la lah ban pynpra ïa u rangïalehkai ‘dien u Mebatskhem L Lyngkhoi bad kumjuh ïa u rangapkol u Rangdajied Pathaw, uba la ïoh ban ïalehlai nyngkong eh ha kane ka aïom.
Hadien katto katne por ka Mawlai ka la ïoh biang ban thep ïa ka kol kaba ar lyngba u Robertson Khongriah uba la shut ïa ka free-kick bad u Arkini u la lah ban pynurlong. Kane ka kynhun ka la ïoh ban thep biang ïa ka kol kaba lai lyngba u Fairming uba la pyndei da ka kjat ka diang. Ha ka jingshisha u Fairming u la dei ban ïoh thep kol biang hadien ka jingïarap pynbuh da u Basuk, hynrei na ka liang u rephri u la rai ba ka dei ka ‘offside’.
Ha ka kylla miet ka Rangdajied ka la sdang ban wanphai da ka jingkhlaiñ bor, hynrei ki rangïalehkai ka Mawlai ki la ïeng skhem ban ym ailad ïa ka liang pyrshah ba kan pynphai.
Hashwa ban wai ka Mawlai ka la ïoh ban thep sa ar kol lyngba u kapten u Damanbhalang uba la pyndei da ka khlieh ha ka free-kick ba la shut da u Robertson bad kawei pat la thep da u Ricky na ka bynta ban khur syndon ïa ka jingjop.
Lah ban kdew kane ka long ka sien kaba ar ba ka Mawlai ka la rah nam lahduh hapoh ka jingïalam u Bah Hering Shangpliang.
Watla kane ka kynhun kam pat ïohpdiang ïa ka trophy nam lahduh, hynrei ki rangïalehkai lem bad ki nongkyrshan ki la ïoh ban lehkmen ha madan. Ïa mynta ki kynhun kiba don ha ka thup kaba hynrei (Top 6) kin ïoh ban ïakhun sa ha ka SSA Super Cup ka ban bud hadien ka SPL.
Ka jingïalehkai ha ka sngi Palei kan long hapdeng ka Sawmer kaba don ha ka kyrdan ba hynñiew pyrshah ïa ka kynhun ba don shatrai ka Mylliem ha ka por 3 baje nohphai sngi. Ka Mylliem ka dei ka kynhun kaba la shah pynhiar kyrdan na kane ka lympung, katba ka Sawmer lada ka lah ban khur jingjop, kan kiew sha ka kyrdan ba san.
