Nongstoiñ, Risaw 07
Ka kynhun ïalehkai jong ka CSGH Majai ka la khur ïa ka jingjop ha ka lympung ïalehkai Mawkaton Invitation Football Tourna -ment 2026 ba la pynlong da ka Mawkaton Sports and Cultural Youth Club ha ka sngi Balang ha madan Mawkaton, West Khasi Hills District.
Kane ka nam jop ka la wan hadien ba ka la pynliem noh ïa ka Friend United Mawkyrwat da 3-1 kol na ka bynta ban khur ïa ki lai poiñ.
Haba phai sha ka jingïalehkai ha kane ka sngi, la ong ba ka long kaba itynnad bad kaba ïakhaid bha lyngba ka jingïakhun jong baroh ar ki kynhun.
Shuh shuh ha katei ka sngi, ïa ka nam Man of the Match la khur da u Wining Warlarpuh na ka CSGH Majai ha kaba u Bah A.R Lyngkhoi, Sordar jong ka Mawkaton u la sam ïa katei ka khusnam.
Haba phai sha ka jingïalehkai jong kiba la rangbah (veteran), la pynsangeh noh na ka daw ka jingshah pynthut ha ki bor ka mariang.
Na ka liang ki nongpynïaid jong katei ka lympung ki la pynbna ba ka jingïalehkai ba bud jong ki veteran ka long hapdeng ka Nuksa FC pyrshah ïa ka NFA Nongstoiñ.
