Shillong, Risaw 07
Ki muktiar na kylleng ka Jylla ki la mih pyrthei biang mynta ka sngi Balang ban pynlong ïa ka jingïaid paidbah ha nongbah Shillong ban dawa na ka Sorkar ban weng noh ïa u Advocate General u Amit Kumar, hadien ba ka por ba ar taïew ba la ai ïa ka Sorkar MDA ka la kut noh khlem da ïoh ïa ka rai.
Ïa kane ka jingïakhih la pynlong hapoh ka lama jong ka Meghalaya High Court Bar Associa-tion bad ka Shillong Bar Association, ha kaba ki muktiar na ki katto katne ki District Bar Association ruh ki la ïashim bynta lang.
Kane ka jingïaid paidbah ka la sdang nakhmat u mot sahkynmaw u Kiang Nangbah hakhmat ka Civil Hospital Shillong ban ïaid ter ter sha Barik, Malki Point, Lachaumiere ban poi biang ha Barik bad pynkut hakhmat u mot u Kiang Nangbah.
Ha kane ka jingïakhih ki la rah ïa ki plakad kiba kynthoh pyrshah ïa u Myntri Rangbah ka Jylla u Conrad K. Sangma bad ïa ka Sorkar bad ki la pyrta ruh ïa ki jingpyrta kynthup “Amit Kumar Go Back.”
Haba ki muktiar ki la mut ban leit phai noh sha Meghalaya High Court ki pulit bad ki Magistrate ki la khang lynti haba ki la poi ha pyrshah ka khyrdop ka State Central Library namar kim shah ban ïaid nakhmat Secretariat.
Hadien ba la ïakren sngewthuh jingmut ki pulit ki la shah ïa ki ban ïaid namar ka dei ka lynti jong ki ban ïaid ban leit ha ophis treikam.
Ha kane ka jingïaid lynti nakhmat Secretariat ki dang don ki dkhot kiba pyrta ban pynrem ïa u Conrad K Sangma bad pyrta “Amit Kumar Go back”.
Haba ïakren bad ki nongthoh khubor, u Kishore Gautam u la ong ba ki muktiar lane ki nongïasaid aiñ ki la bteng ïa ka jingïakhih jong ki namar ka jingai por kaba ar taïew ïa ka Sorkar Jylla ban weng ïa u Amit Kumar kam shym la urlong haduh mynta.
U Gautam u la ïathuh ruh ba ha ka jingïakynduh kham mynshwa bad u Myntri Rangbah ka Jylla u Conrad K. Sangma, la pynthikna ïa ki nongïasaid aiñ ba u Amit Kumar un nym leit mih hakhmat ka High Court bad kiwei pat ki ïingbishar lane ki tribunal katba dang bishar bniah ïa ki jingeh bad ki jingkynnoh jong ki.
Hynrei u la kynnoh ba hadien kata u Kumar u la bteng ban wan mih ha ïingbishar, kaba la wanrah biang ïa ka jingbym sngewhun hapdeng ki dkhot jong ka Bar.
U Gautam u la ong ba u la pyntip sha u Myntri Rangbah ka Jylla lyngba ki message ha ka ‘phone’ bad ‘WhatsApp’ halor ka jingkynnoh ba u Kumar u la leit mih biang sha ki jaka bishar, hadien ka jingbthah ban pyntip ïa kino-kino ki jingjia kiba kum kine. U la ong ba hadien kata ki nongïasaid aiñ ki dang khmih lynti ïa ka jingïakynduh biang bad u Myntri Rangbah ka Jylla.
U Gautam ula ong ka jingkular kam don satia da ka jingthoh hynrei u khmih lynti ba ka jingkular u Conrad ka dei kaba don jingmut eiei namar kim dei ki riew madan ki dei ki nongïasaid aiñ.
U la ong ba ka jingïaid paidbah mynta ka sngi ka long tang ban pyni ïa ka jingïatylli halor ka jingbha lang jong baroh ki nongïasaid aiñ kaba la sdang da ka High Court Bar Association bad Shillong Bar Association
U la pyntip ruh ba ka jingïakhih kan dang jur nangne shakhmat hadien ba la dep shong jingïalang jong ka Executive Committee jong baroh ki District bad ka High Court Bar Association.
